Mosta għamlu pass ieħor pożittiv meta rnexxielhom jegħlbu lil Gzira United 2-1 biex telgħu jaqsmu r-raba’ post tal-klassifika ma’ Balzan f’loghba li l-Maroons iddominaw għal ħinijiet twal imma finalment kienu l-Mostin li dawru r-riżultat favur tagħhom wara li sabu ruħhom gowl minn taħt.
Gzira fetħu fuq l-attakk u marru fil-vantaġġ fl-ewwel azzjoni li ħolqu fl-10 minuta meta Marcelo Dias bidel il-ballun ma’ Jefferson De Assis, bid-difensur Mosti Tyrone Farrugia jidher f’qagħda tajba li jikklerja imma huwa halla l-ballun lill-goalkeeper Ini Akpan biex daħal bejniethom Dias li qabbeż il-ballun minn fuq Akpan u tefgħu fix-xibka.
Immedjata r-reazzjoni Mostija li kisbu l-goal tad-draw fis-16-il minuta permezz ta’ freekick dirett ta’ Clayton Failla li l-gowler Zarkov naqas li jippanċja tajjeb biex il-ballun spiċċa fix-xibka.
Gzira kienu għoddhom reġgħu marru fil-vantaġġ żewġ minuti wara meta Nikolai Muscat qassam lil Jefferson De Assis li llobbja għar-rokna b’Akpan megħlub imma l-ballun ħabat mal-lasta l-wieqfa qabel gie kklerjat minn Tyrone Farrugia.
Gzira baqgħu aktar aggressivi u reggħu resqu qrib fit-28 minuta meta Muscat għadda ballun tajjeb lil Jefferson imma Akpan ħareg tajjeb jinterċetta barra l-kaxxa, waqt li minuta biss wara Jefferson reġa’ ttanta xortih b’xutt li Farrugia mblokka f’korner.
Fis-37 minuta f’kontrattakk Mosti Diarra temm azzjoni personali b’xutt li ghadda ftit barra.
In-naha l-ohra fid-39 minuta l-konklużjoni ta’ Steve Pisani ġiet salvata f’korner mill-gowler Akpan.
Fit-tieni taqsima Gzira baqgħu aktar avventurużi fil-logħob tagħhom imma bdew isibuha diffiċli jippenetraw id-difiża Mostija tant li ftit li xejn ħolqu periklu għal-lasta ta’ Akpan.
Fis-47 minuta minn kross ta’ Pisani, Kolega xxuttja għoli minn qagħda ċentrali, filwaqt li fis-66 minuta reġa’ kien Pisani li għadda ballun tajjeb ‘il quddiem fil-kaxxa Mostija imma s-sostitut Maxuell Maia fflikkja barra.
Fis-70 minuta r-referee Petrovic wera karta safra u mmedjatament wara karta hamra lil Sharlon Pace, President ta’ Gżira, talli deher jipprotesta.
Mosta ppruvaw joperaw bil-kontrattakki u rnexxielhom imorru fil-vantagg fid-79 minuta b’azzjoni li waslet minn azzjoni ta’ korner wara li l-gowler tal-Maroons David Cassar salva f’korner it-tentattiv ta’ Zachary Brincat.
Mill-korner mogħti minn Ememe kien l-istess Zachary Brincat li bir-ras mill-qrib tefa’ l-ballun fir-rokna tax-xibka.
Gzira tħabtu biex fil-ħin li kien baqa’ jippruvaw isalvaw ir-riżultat, iżda l-aktar li resqu kien fil-ħin miżjud meta minn kross ta’ Dias, Jefferson bir-ras xeħet għoli.
Referee: Slobodan Petrovic
Plejer tal-Loghba: Steven Pisani (Gzira Utd)
