Raġel li kien involut f’qerq dwar assigurazzjoni għaxar snin ilu kellu sentenza ta’ ħames snin ħabs effettivi mibdula għal 240 siegħa ta’ servizz fil-komunità. Dan wara li l-każ tiegħu nstema’ mill-ġdid wara li l-ewwel kundanna ġiet annullata kaġun ta’ difett proċedurali.
Aaron Charles Zahra, ta’ 41 sena, missier ta’ tlett itfal, kien wieħed mill-parteċipanti f’kumplott biex kumpaniji tal-assigurazzjoni jiġu frodati b’ammonti sostanzjali ta’ flus.
Fl-2013, il-Pulizija kienet ġiet infurmata dwar talbiet tal-assigurazzjoni li jikkonċernaw inċidenti tat-traffiku li dehru li kienu dubjużi. L-investigazzjonijiet kixfu sensiela ta’ ħabtiet li dehru li saru apposta sabiex il-partijiet involuti jkunu jistgħu jippreżentaw talbiet għal kumpens mill-assigurazzjoni.
Madwar 32 persuna suspettata ġew akkużati b’rabta mal-iskema. Wieħed minnhom kien Zahra li, għalkemm mhux ċentrali għall-kumplott, kiseb somom sinifikanti ta’ flus wara li għamel talbiet b’rabta ma’ tliet ħabtiet tat-traffiku. Fl-2020, Zahra nstab ħati u ġie kkundannat għal 5 snin ħabs effettivi wara li ammetta għal frodi, għamel dikjarazzjoni falza, volontarjament għamel ħsara lill-proprjetà tiegħu stess biex jitlob il-flus tal-assigurazzjoni, kif ukoll li rkada.
Dik il-kundanna ġiet annullata fl-appell, minħabba difett proċedurali, u ntbagħtet lura l-Qorti tal-Maġistrati. Issa l-Qorti nnotat li, minkejja l-gravità tar-reat li wettaq, l-akkużat kien ammetta l-ħażin u ma kienx il-moħħ ewlieni wara l-iskema. Barra minn hekk, huwa kien ħallas lura s-somom li kien ibbenefika illegalment minnhom.
Il-Qorti innotat ukoll li rapport ta’ qabel is-sentenza juri li kellu relazzjoni stabbli u familja li tappoġġjah, kellu impjieg fiss u kien diliġenti ħafna.
Ritratt: thefloodlawfirm
