F’konfront li ntlagħab quddiem attendenza medjokri, Floriana ħallew għall-aħħar biex għelbu lil Zebbug Rangers bl-iskor minimu ta’ 1 -0, bil-goal tant importanti għalihom jasal minn Lorenzo Trillo fis-86 minuta.
Kienu Floriana li ħarġu fuq l-offensiva u wara biss sitt minuti, l-attakkant internazzjonali Malti Jan Busuttil kellu xutt minn ġol-kaxxa li ġie salvat minn mal-art mill-goalkeeper ta’ Zebbug Rangers, Jamie Azzopardi.
Huma komplew fuq l-offensiva u fis-27 minuta xutt kemmxejn fraġli ta’ Alen Melunovic, ġie salvat mingħajr wisq diffikultá minn Jamie Azzopardi.
Kulma jmur kompla d-dominju assolut tal-Greens u fis-36 minuta Lorenzo Trillo xeħet kross għan-nofs iżda ma sab lil ħadd mill-players sħabu biex jagħmel kuntatt mal-ballun, li finalment intemm barra.
Zebbug Rangers wieġbu għall-ewwel darba fil-45 minuta meta Jeferson Macedo kellu xutt minn pożizzjoni ideali li ġie salvat tajjeb mill-goalkeeper żagħżugħ ta’ Floriana, Duncan Formosa.
Fil-ftuħ tat-tieni taqsima, il-Greens komplew bl-istess ritmu tal-ewwel waħda u wara biss 40 sekonda, Jan Busuttil xeħet cross li sab lis-sotitut Kemar Reid li kellu d-daqqa ta’ ras tiegħu mill-viċin tgħaddi ftit għoli.
Huma komplew jippressaw u fis-57 minuta, freekick insidjuż ta’ Jan Busuttil ġie kklerjat f’korner qabel ma seta’ jilħaq Kemar Reid.
Floriana tilfu ċans tad-deheb li jiftħu l-iskor minuta biss wara meta Lorezno Trillo kelli xutt fil-baxx minn pożizzjoni ideali li għadda jħakkek ma’ sieq il-wieqfa.
Fit-62 minuta, l-iskorer prolifiku Charles Lokoli Ngoy ġie wiċċ imb’wiċċ ma’ Duncan Formosa, iżda dan tal-aħħar imblokka tajjeb.
Huma komplew fuq l-offensiva u ħames minuti wara, xutt mid-distanza ta’ Almir De Jesus Soto Maldonado, kważi ħasad għal kollox lil Formosa li dawwar tajjeb f’korner.
Kulma jmur kompla d-dominju assolut ta’ Zebbug u fit-78 minuta, Lokoli Ngoy, temm ġirja tajba, permezz ta’ xutt fil-baxx minn ġol-kaxxa li ġie salvat minn mal-art minn Formosa.
Iżda kienu Floriana li skorjaw il-goal tar-rebħa fis-86 minuta meta Jan Busuttil għadda tajjeb lejn Lorenzo Trillo li kellu x-xutt angulat tiegħu minn ġol-kaxxa jintemm fir-rokna tax-xibka.
Huma tilfu ċans tad-deheb li jirdoppjaw l-iskor fil-ħin miżjud meta Kemar Reid minn quddiem Formosa tefa’ inkreddibilment barra.
Referee: Daryl Agius
Player tal-Logħba: Charles Lokoli Ngo (Zebbug R.)
