L-atleta malti tal-Arm Wrestling Kersten Mercieca għadu kemm kiseb suċċess importanti hekk kif ħa sehem fl-ewwel turnament internazzjonali professjonali u saħansitra rebaħ il-kategorija tiegħu.
Mercieca rebaħ il-kategorija tad-90kg fl-Arm Wrestling Tournament fl-Italja mingħajr telfa waħda.
Dan is-suċċess wasal wara perijodu diffiċli għalih. Filfatt sena ilu, Kersten kien qed jaħsibha jieqafx għall-kollox minn dan l-isport hekk kif kellu injury. Wara li ġie operat, Kersten beda r-rijabilitazjoni u d-determinazzjoni għenitu jirkupra tant li ftit ilu seta’ jirritorna għall-kompetizzjoni.
Mercieca qed jagħmel isem fil-kompetizzjonijiet internazzjonali li jieħu sehem fihom.
Madanakollu jħoss li l-Arm Wrestling jista’ javvanza iżjed jekk ikollu għajnuna mill-awtoritajiet.
Huwa jixtieq li jwaqqaf Federazzjoni lokali li tkun tista’ taħdem sabiex din id-dixxiplina tikber u tiżviluppa dejjem aktar.
Xi ħaġa li sfortunatament bħalissa ma jistax jagħmel hekk kif f’pajjiżna l-Arm Wrestling għadu mhux rikonoxxut bħala sport.
Kersten Mercieca jħoss li f’din id-dixxiplina tal-Arm Wrestling, Malta jista’ jkollha riżultati sbieħ u għalhekk qed jappella sabiex din l-istess dixxiplina tiġi rikonoxxuta.
