F’logħba mill-aqwa fl-iStadium Nazzjonali, Birkirkara eliminaw lill-Hamrun b’gowl wieħed biex kwalifikaw għas-semi finali tal-IZIBET FA Trophy.
Fl-ewwel azzjoni tal-partita Ryan Camenzuli kellu xutt li għadda ferm għoli mil-lasti ta’ Nava. Ir-risposta ta’ Birkirkara waslet fis-sittax il-minuta meta xutt ta’ Diego Pires Dall’Oca ġie salvat minn Henry Bonello.
Sekondi biss wara u Birkirkara marru fil-vantaġġ meta ġirja tajba ta’ Paul Mbong minfuq il-lemin, minkejja issikkat minn Marcelina, xeħet għan-nofs u pront kien Enzo Cabrera li spara fix-xibka u poġġa lill-stripes fil-vantaġġ.
Fil-26 minuta free-kick ta’ Roko Prsa jagħdi kemm kemm barra mil-lasti ta’ Nava u sekondi wara konklużjoni mill-viċin ta’ Elvis Sukisa Mashike li għaddiet barra.
Hamrun komplew iżidu fil-logħob tagħhom u fil-36 minuta free-kick ta’ Roko Prsa, salva b’diffikulta Nava. Sekondi biss wara mill-ġdid l-Spartans b’korner ta’ Ederson Bruno Domingos u Marcelina bir-ras minn taħt il-lasta xeħet ftit għoli.
Lejn tmiem l-ewwel taqsima konklużjoni minn tlett kwarti ta’ grawnd ta’ Ognjen Bjelicic, salva iżda ma’ żammx il-goalkeeper Nava u mir-rebound Elvis Sukisa Mashike d-depożita l-ballun fix-xibka, liema gowl pero ġie annullat għal offside.
Fl-aħħar azzjoni tal-ewwel taqsima Birkirkara kellhom l-opportunita li jagħmlu l-iskor 2 -0 meta f’kontra-attakk veloċi, Paul Mbong wiċċ imb’wiċċ mal-goalkeeper Henry Bonello, inkredibilment tefa’ l-ballun barra.
Birkirkara fetħu tajjeb fit-tieni 45 minuta meta minn korner ta’ Ribeiro l-konklużjoni ta’ Osvaldo Iorio għaddiet ftit għoli.
Ftit wara korner ta’ Matteo Fedele u daqqa ta’ ras ta’ Yannick Yankam għal Birkirkara għaddiet għoli.
L-ewwel azzjoni ta’ Hamrun fit-tieni taqsima waslet mas-siegħa logħob meta Juan Carlos Carbolan wara li kontrola l-ballun, ikkonkluda fil-baxx b’Giacomo Nava jsalva bla wisq diffikulta.
Ħames minuti wara r-risposta ta’ Birkirkara meta minn kross ta’ Cabrera, Marcelina ta’ Hamrun tajjar f’korner biex l-Spartans ħelsuha ħafif minn azzjoni li setat waslet għat-tieni gowl Karkariż.
Fil-71 minuta Hamrun kellhom free-kick minn pużizzjoni ideali ta’ Matthew Guillaumier għaddiet għoli.
Sitt minuti mit-tmiem attakk ieħor ta’ Hamrun meta kross ta’ Camenzuli, l-ballun ġie għand Mbong li ra lil Nava jsalvalu.
Fil-90 minuta free-kick ċentrali ta’ Bjelicic, salva ferm tajjeb Giacomo Nava.
Hamrun viċin il-gowl tad-draw fl-aħħar sekondi meta xutt b’saħtu ta’ Ognjen Bjelicic, Kurt Zammit salva minfuq il-linja tal-gowl.
Referee: Ishmael Barbara
