Ir-Rappreżentant Għoli tal-Unjoni Ewropea għall-Affarijiet Barranin u l-Politika tas-Sigurtà, Josep Borrell, faħħar lil Malta għall-mod kif qed tmexxi l-Presidenza tal-Kunsill tas-Sigurtà tan-Nazzjonijiet Uniti f’dan iż-żmien diffiċli.
F’kitba fuq Twitter, Borrell qal li, flimkien, l-Unjoni Ewropea u l-Istati membri tagħha se jkomplu jaħdmu biex jiddefendu l-prinċipji u l-valuri tan-Nazzjonijiet Uniti: dawk tal-paċi u s-sigurtà fid-dinja.
Borrell għadda dan il-kumment wara li l-Kunsill tas-Sigurtà tan-Nazzjonijiet Uniti, bħalissa ppresedut minn Malta, iddiskuta l-koperazzjoni tan-Nazzjonijiet Uniti u tal-Unjoni Ewropea, fost l-oħrajn.
Waqt dik id-diskussjoni, il-Ministru għall-Affarijiet Barranin, Ian Borg, sostna li Malta impenjata li tkompli taħdem biex tippromwovi l-importanza tal-paċi u d-djalogu madwar id-dinja.
Il-Ministru Borg saħaq li l-prinċipji tan-Nazzjonijiet Uniti u l-valuri tal-Unjoni Ewropea huma kumplimentari u għandhom ikomplu jissaħħu.
Qal ukoll li r-relazzjonijiet bejn it-tnejn għandhom jissaħħu, b’mod partikolari fl-oqsma tad-drittijiet tal-bniedem, is-saltna tad-Dritt, u l-proċessi ta’ soluzzjonijiet paċifiċi għat-tilwim.
Il-Ministru Borg ikkummenta dwar il-laqgħa bilaterali li kellu mar-Rappreżentant Għoli tal-Unjoni Ewropea, Josep Borrell.
“Illum tajtu redikont tax-xogħol li qed tagħmel il-Presidenza Maltija u hu infurmani bil-prijoritajiet tal-Unjoni Ewropea u eventwalment imxejna għall-Kunsill tas-Sigurtà, fejn hemmhekk huwa għarraf, informa, lill-Kunsill bil-ħidma, bil-koperazzjoni bejn l-Unjoni Ewropea u n-Nazzjonijiet Magħquda.”
Intant, 141 pajjiż membru tan-Nazzjonijiet Uniti vvutaw favur Riżoluzzjoni tal-Paċi mressqa mill-Ukrajna bil-għan li r-Russja twaqqaf l-invażjoni fl-art Ukrena. Dan ifisser madwar żewġ terzi tal-pajjiżi tan-Nazzjonijiet Uniti. Din il-mozzjoni ġiet imressqa mill-Ministru għall-Affarijiet Barranin Ukren, Dymtro Kuleba.
