F’partita pjaċevoli, Floriana u Gzira United temmew il-konfront ta’ bejniethom fi draw ġust ta’ 1-1, biż-żewġ goals jaslu fl-ewwel taqsima.
Floriana għamlu l-intenzjonjiet tagħhom ċari mal-ftuħ tal-partita u fetħu l-iskor wara biss erba’ minuti meta Kemar Reid approfitta minn indeċiżjoni ta’ Gabriel Bohrer Mentz barra l-kaxxa, avvanza tajjeb u tefa’ ġewwa.
Iżda Gzira ma rmewx ix-xugaman anzi wettqu reazzjoni tajba u mal-kwarta logħob ġabu l-iskor indaqs meta Nikolai Muscat kellu xutt mhux daqstant preċiz li ntemm għand Jefferson De Assis li mill-viċin tefa’ ġewwa.
Il-Maroons komplew jipproduċu logħob sabiħ u fit-38 minuta, xutt minn ġol-kaxxa ta’ Jefferson De Assis minn ġol-kaxxa ġie salvat mill-goalkeeper ta’ Floriana, Reece Cutajar, li f’din il-partita kien qed jieħu post il-goalkeeper titolari Bulgaru, Georgi Kitanov.
Floriana wieġbu fil-45 minuta permezz ta’ Mattia Veselji li kellu x-xutt tiegħu salvat bi bravura mill-goalkeeper Kroat tal-Maroons, Darijan Zarkov.
Gzira ħolqu l-periklu fil-61 minuta meta Maxuell Maia minn pożizzjoni ideali kellu xutt salvat minn Reece Cutajar.
Fis-86 minuta, xutt mill-viċin ta’ Andrew Borg dejjem għall-Maroons intemm barra.
Referee: Matthew De Gabriele
Plejer tal-Logħba: Jefferson De Assia (Gżira U.)
