Il-Prim Ministru Robert Abela fil-Parlament innomina lill-Prim Imħallef Emeritu Dr Joseph Azzopardi sabiex jinħatar bħala Kummissarju għall-Istandards fil-Ħajja Pubblika.
Il-Prim Ministru għamel dan it-Tnejn filgħaxija hekk kif fil-jiem li ġejjin il-Parlament se jkun qed jivvota fuq l-isem ta’ Azzopardi skont l-Att tal-Istandards fil-Ħajja Pubblika u li kien emendat ftit tal-ġimgħat ilu.
Emenda li permezz tagħha ddaħħal mekkaniżmu ta’ żblokk f’każ li jibqa’ ma jintlaħaqx qbil bejn iż-żewġ naħat tal-Kamra dwar il-ħatra ta’ Kummissarju għall-Istandards fil-Ħajja Pubblika.
Emenda li l-Partit Nazzjonalista vvota kontriha anke wara li l-Kap Nazzjonalista Bernard Grech ġie mġiegħel imur lura minn kelmtu minn dawk li verament imexxu fil-Partit Nazzjonalista. Dan wara li inizjalment, mal-Prim Ministru, Grech kien wera qbil dwar in-nomina.
Fid-diskors tiegħu, il-Prim Ministru beda billi tenna l-importanza li dan il-Gvern jagħti lill-istituzzjonijiet ta’ pajjiżna billi impenja ruħu favur dan il-mekkaniżmu ta’ żblokk biex din il-kariga tant importanti ma tibqax battala.
Il-Prim Ministru tenna wkoll id-dispjaċir tiegħu għall-argumentazzjoni tal-Oppożizzjoni sabiex skreditaw lill-Prim Imħallef Emeritu Joseph Azzopardi.
“Jiena ħaġa waħda ma nifhimx Sur President, ma nifhimx kif in-naħa l-oħra qatt tippretendi li tmexxi lil dan il-pajjiż meta qas għandkom il-manjieri, id-dekor u l-buon sens biex ma tippruvawx tbaxxu l-isfel, ma tippruvawx tiddegradaw lil min għal snin twal ta servizz impekkabbli ta’ dan il-pajjiż fl-ogħla karigi istituzzjonali.”
Hawn il-Prim Ministru tenna li l-Kap Nazzjonalista Bernard Grech għandu jerfa’ r-responsabbiltà għat-ton ta’ diskussjoni li adotta l-Partit Nazzjonalista tul dan id-dibattitu.
Intant il-Prim Ministru xejjen il-kredibbiltà li tipprova tassumi l-Oppożizzjoni fil-qasam tal-ġustizzja billi rrefera għal numru ta’ istanzi fejn saħansitra membri tagħha jgħeddu ġudikant biex jieħu deċiżjonijiet favurihom.
“Tasal ġurnata fejn il-Qorti Kriminali tkun mistennija tagħti digriet dwar każ sensittiv. Ftit tas-sigħat qabel joħorġu fuq social media pubblikament jattakkaw lill-Imħallef personalment fuq allegazzjoni li bir-rispett kollu tikkostitwixxi ħmerijiet u ċuċati imma jagħmluha b’mod u manjiera li jikkundizzjonawh u jagħti d-deċiżjoni li jridu huma. Imisskom tistħu li tagħmlu dawn it-tip ta’ tattiċi, umbagħad tippretenduha li inthom paladini tas-saltna tad-dritt. Qas tafu xi tfisser inthom is-saltna tad-dritt.”
B’differenza għal dan, il-Prim Ministru sostna l-kriterji li għandu jkollu persuni li jokkupa din il-kariga filwaqt li elenka wkoll il-kwalifiċi tal-Prim Imħallef Emeritu Joseph Azzopardi.
Fil-fatt, il-Prim Ministru rrefera wkoll għall-argumentazzjoni fjakka mill-Oppożizzjoni kontra dawn l-istess kwalifiċi.
“L-ironija li l-istess sħabu tad-dawra li qalulu biex jgħid li l-Prim Imħallef mhuwiex bieżel huma l-istess nies fil-Grupp Parlamentari Nazzjonalista ftit tal-jiem ilu marru ġewwa l-Grupp Parlamentari tal-Partit Nazzjonalista u lill-Kap tal-Oppożizzjoni nniffsu qalulu inti mintix bieżel lanqas ta’. Dik l-ironija Sur President.”
Hekk kif temm id-diskors tiegħu, il-Prim Ministru ħeġġeġ lill-Oppożizzjoni sabiex tivvota favur in-nomina tal-Prim Imħallef Emeritu għal din il-kariga tant importanti, anke skond il-ftehim milħuq oriġinarjament.
Dr Abela sostna li dan l-uffiċċju jagħti kreddibiltà anke lill-Gvern fl-impenn tiegħu favur is-saltna tad-dritt. Dan b’differenza għall-Oppożizzjoni li f’25 sena fil-Gvern kienu nedew biss diskussjoni fuq dan l-uffiċċju.
“Il-ġenerazzjonijiet futuri jiddependu wkoll fuq id-deċiżjonijiet li jittieħdu hawn u dawk id-deċiżjonijiet irridu iva nfassluhom b’mod tajjeb flimkien biex pajjiżna jibqa’ miexi ’l quddiem. Għalija dik tfisser il-politika. Grazzi Sur President.”
