L-għajnuna fiskali li qed jagħti l-gvern Malti sabiex itaffi l-effetti tal-prezzijiet esaġerati tal-enerġija u fuels huwa darbtejn u nofs aktar mill-medja fl-istati membri tal-Unjoni Ewropea, u s-sena li għaddiet kien it-tieni l-ogħla.
Dan intqal mill-Fond Monetarju Internazzjonali, l-IMF, u li stħarrġet aktar dwaru l-gazzetta Kullħadd fil-ħarġa tagħha tal-Ħadd.
Fil-fatt, ħareġ kif bħala medja, pajjiżi Ewropej nefqu wieħed fil-mija tal-prodott gross domestiku tagħhom, iżda f’Malta, intefqu tnejn punt ħamsa fil-mija, filwaqt li fl-elfejn tlieta u għoxrin, dan is-sostenn se jkopri tlieta punt ħamsa fil-mija.
Skont l-IMF, dan ifisser li l-politika tal-Gvern għenet biex issostni l-fiduċja tal-konsumaturi, il-pagi u l-attività ekonomika.
B’kuntrast, ġie nnutat kif fost l-oħrajn, pajjiżi fit-tramuntana tal-Ewropa nefqu għaxar darbiet inqas minn pajjiżna f’dan is-settur, b’konsegwenza ta’ dan tkun inflazzjoni għolja ħafna u nuqqas drastiku fil-konsum tal-familji.
Dawn il-kummenti minn esperti internazzjonali jirriflettu l-ħsibijiet tal-imsieħba soċjali, li nnutaw kif mingħajr dan is-sostenn, Malta kien ikollha inflazzjoni ogħla minn għaxra fil-mija, filwaqt li ż-żieda tal-COLA kienet tkun id-doppju ta’ dik li ngħatat, li jfisser nuqqas ta’ kompetittività għal pajjiżna.
L-IMF tkompli tinnota kif it-tielet rebħa elettorali konsekuttiva għall-Partit Laburista tfisser kontinwità tal-politika fiskali eżistenti, hekk kif innutaw li tul is-snin, gvern Laburista mexa’ fuq ir-rakkomandazzjonijiet tal-istess esperti.
Fid-dawl tal-kritika mill-Oppożizzjoni dwar it-tmexxija tal-ekonomija, l-IMF stqarret li l-miżuri mħabbra fil-Budget huma approprijati, speċjalment meta wieħed jikkunsidra li d-dejn nazzjonali mistenni jibqa’ taħt is-sittin fil-mija.
Rigward it-tmexxija tal-ekonomija minn livell istituzzjonali, l-IMF laqgħet il-ħidma tal-gvern li wasslet għall-ħruġ ta’ Malta mill-lista l-griża tal-FATF, u laqgħu ukoll iż-żieda fir-riżorsi tal-istituzzjonijiet regolatorji.
