Silvio Vella huwa l-kowċ li ser jieħu f’idu t-tmexxija tat-tim ta’ Hibernians FC hekk kif l-MFA ħabbret li lis-istess Vella talab li jinħall mill-kuntratt li kellu mal-assoċjazzjoni, liema talba ġiet milqugħa.
Din l-aħbar ġiet ikkonfermata minn Hibernians FC permezz tal-paġna uffiċjali tagħhom fuq facebook.
Vella għad għandu rabta qawwija mal-klabb Pawlist hekk kif l-aqwa żmien tal-karriera tiegħu fil-futbol kien propju ma’ dan il-klabb. Madankollu, l-ewwel pass kellu jkun li jinħall minn kull rabta minn mal-assoċjazzjoni Maltija fejn filfatt kien qed jokkuppa l-pożizzjoni ta’ Head of Football Regional Hubs fi ħdan l-fondazzjoni Inħobb il-futbol.
Silvio Vella ser ikun qed jieħu post Andrea Pisanu li propju temm ir-relazzjoni tiegħu mal-istess Hibernians kmieni t-Tnejn filgħodu. Nifhmu li Vella ser ikun qed jiffirma kuntratt sat-tmiem l-istaġun 2023 / 2024.
