Fl-ewwel partita tas-Sibt wara nofsinhar, l-leaders Hamrun Spartans kisbu rebħa ta’ 1 – 0 fuq Floriana biex komplew bil-mixja pożittiva tagħhom u saħansitra jersqu viċin iżjed ir-rebħ tal-Kampjonat.
Hamrun fetħu fuq l-attakk imma ftit li xejn dehru effettivi tant li l-unika azzjoni denja waslet wara ħames minuti meta Elvis Mashike temm ġirja fuq il-lemin bi kross għan-nofs imma Prsa ma laħaqx fil-ħin u l-azzjoni sfumat.
Floriana bdew ġejjin ftit ftit u fil-25 minuta Jan Busuttil rebaħ ballun f’nofs il-grawnd u avvanza qabel fajjar xutt li l-goaler Hamruniż Bonello salva f’korner.
Ħames minuti wara Jose Arias ixxuttja dirett għal-lasta minn azzjoni ta’ freekick għal Floriana iżda Bonello għal darb’oħra ntefa’ tajjeb biex dawwar f’korner.
Fl-44 minuta azzjoni oħra personali ta’ Elvis Mashike bil-kross tiegħu ddevjat f’korner mill-goalkeeper Furjaniz Kitanov. Mill-korner, Bjelicic mill-qrib indirizza bir-ras imma Kitanov salva mingħajr wisq diffikulta’.
Fit-tieni taqsima Hamrun mill-ewwel taw l-impressjoni li se jtejbu l-wirja tagħhom imma kellna nistennew sal-65 minuta sabiex nassistu għall-gowl tal-vantagg ħamruniz, li kien ukoll il-goal deċiżiv, meta minn freekick mogħti minn Bjelicic, il-goaler Kitanov imblokka kif seta’ u wara tentattivi ta’ Callegari u Mashike, finalment kien Matthew Guillaumier li spara mill-qrib fis-saqaf tax-xibka.
Fid-69 minuta Hamrun resqu qrib li jirduppjaw meta Guillaumier qassam lil Prsa li xxuttja minn tarf il-kaxxa imma Kitanov salva tajjeb.
Floriana wieġbu fis-77 minuta b’tentattiv tas-sostitut Veselji li ġie kklerjat fuq il-linja mid-difensur Ħamruniż Callegari.
Veselji reġa’ kellu ċans li jittanta xortiħ fid-89 minuta imma naqas li jolqot il-ballun bir-ras minn kross ta’ Busuttil.
Fil-ħin miżjud, l-ewwel assistejna għal protesti Furjanizi li dehrilhom li difensur Hamruniz mess il-ballun b’idu fil-kaxxa qabel ikklerja azzjoni Furjaniza, imbagħad kien is-sostitut Hamruniz Jorge Ailton Soares li tilef ċans tajjeb meta qabeż difensur imma dam jaħsibha biex il-ballun ġie kklerjat.
L-aħħar azzjoni fl-94 minuta waslet mis-sostitut Svediz ta’ Hamrun Karl Homberg li x-xutt tiegħu minn tarf il-kaxxa ġie salvat minn Kitanov. Homberg dahal bħala sostitut għal Hamrun fil-85 minuta fl-ewwel dehra tiegħu ghalihom.
Referee: Philip Farrugia
Player tal-Loghba: Matthew Guillaumier (Hamrun S.)
