Fit-tieni partita tas-Sibt fit-Tony Bezzina Stadium, Mosta skorjaw erba darbiet kontra Pieta Hotspurs biex b’hekk komplew jikkonfermaw l-intenzjonijiet tagħhom, dak li jilgħabu f’kompetizzjoni Ewropeja staġun ieħor.
L-ewwel taqsima kienet pjuttost nieqsa mill-azzjonijiet tant li kellna nistennew sal-21 minuta sabiex nassistu għall-ewwel azzjoni denja meta l-attakkant ta’ Pieta’ Temitope Abraham ttanta xortiħ b’xutt minn qagħda angolata bil-goaler Mosti Akpan isalva b’diffikulta’ f’korner.
Tliet minuti biss wara Mosta resqu qrib meta daqqa ta’ ras ta’ Ferebory Dore giet ikklerjata b’diffikulta mid-difiża tal-Hotspurs biex mir-rebound minn qagħda tajba Chris Ememe fajjar xutt li spiċċa ferm ‘il bogħod mil-lasta.
Mosta reġgħu resqu qrib fil-ħin miżjud qabel intemmet it-taqsima bi kross ta’ Clayton Failla u xutt mill-ewwel ta’ Dore jispiċċa ftit barra.
It-tieni taqsima bdiet fuq nota aktar movimentata hekk kif fis-46 minuta Mosta resqu qrib permezz ta’ xutt ta’ Kaishu Yamazaki li l-GK Reeves Cini salva tajjeb.
Pieta’ wieġbu tliet minuti biss wara b’xutt angolat ta’ Miranda Rodrigues li Akpan salva f’korner.
Fit-52 minuta Mosta ngħataw penalty meta Yamazaki ġie ffawljat fil-kaxxa minn Bangura biex mill-11-il metru s-solitu Clayton Failla ma falliex biex poġġa lit-tim Mosti fil-vantaġġ.
Ir-reazzjoni tal-Hotspurs waslet fit-63 minuta meta s-sostitut Takuma Yamaguchi temm azzjoni personali b’xutt li l-goaler Akpan salva f’korner.
Fis-70 minuta Mosta heddew bi kross ta’ Failla u xutt mill-ewwel tas-sostitut Precious Linus Tenebe li l-goaler Cini salva tajjeb.
Fid-79 minuta Pieta’ pprotestaw mar-referee għax dehrilhom li l-goalkeeper Mosti Akpan lagħab il-ballun b’idu barra l-kaxxa imma r-referee ħalla l-logħob għaddej.
Żewg minuti wara Dore kellu tentattiv li deher jaħbat mal-lasta, izda fil-85 minuta Mosta prattikament issiġġillaw ir-rebħa b’azzjoni tajba bejn Precious Linus u Michael Chidera Okoh b’dan ta’ l-aħħar jiskorja mill-qrib.
L-istess Michael Chidera Okoh reġa’ skorja fil-91 minuta biex għamilhom 3-0 ghal Mosta filwaqt li sostitut ieħor William Legault skorja gowl ieħor ghat-tim Mosti fil-95 minuta għal skor finali ta’ 4-0.
Referee: Ezekiel Barbara
Player tal-Loghba: Clayton Failla (Mosta)
