Il-Kap tal-Partit Nazzjonalista, Bernard Grech mhux l-ewwel darba li ddubita l-għajnuna li l-Gvern qed jagħti fis-settur tal-enerġija.
F’laqgħa tal-Kamra tal-Kummerċ li saret il-Ġimgħa, Bernard Grech wissa li din l-għajnuna mhux sostenibbli.
Hu qak, “Li tibqa’ tissussidja l-enerġija żgur li mhijiex l-aktar għażla sostenibbli.”
Il-fatt li, skont hu, l-għajnuna ma tistax tibqa’ sejra, irrepetih anke wara din il-laqgħa, meta ġie mistoqsi mill-ġurnalisti.
Qal, “Irridu nifhmu li din ma tistax tibqa’ sejra għal dejjem.”
Iżda, din mhix l-ewwel darba li Bernard Grech wera x-xettiċiżmu tiegħu dwar il-politika tal-Gvern f’dan ir-rigward. Wara l-Baġit għall-2022, Bernard Grech ġie mistoqsi dwar il-prezzijiet internazzjonali u kien wieġeb hekk.
“L-ewwel ħaġa, rigward il-prezzijiet, meta l-prezzijiet, bħalma ġara fl-2008, 2009, 2010, 2011, u 2012, jogħlew internazzjonalment, jogħlew għal kulħadd.”
Dawn id-dikjarazzjonijiet huma simili għal dawk tal-aħħar gvern Nazzjonalista. Tonio Fenech, li llum il-Partit Nazzjonalista jużah biex ikun fuq quddiem nett ta’ kampanji kontra r-riformi soċjali tal-Gvern, bħall-IVF, kien qal hekk.
“Mela, toqogħdux tħarsu lura u tgħidu, ‘għax se jerġa’ jorħos’, għax mhux se jerġa’ jorħos. Mela rridu nidraw.”
Dan jikkuntrasta ħafna mal-politika tal-Gvern wara l-elfejn u tliettax, meta mhux biss il-gvern Laburista raħħas il-kontijiet, iżda fl-eqqel ta’ pandemija u waqt gwerra żamm stabbli l-prezzijiet tal-elettriku u tal-fjuwil – politika li għenet biex tiġi kkontrollata l-inflazzjoni u, f’mumenti ta’ pressjonijiet internazzjonali, il-Gvern iwieżen u mhux iżid il-piż fuq il-familji.
Qal, “Nisma’ l-Kap tal-Oppożizzjoni llum u jgħidlek illi l-pajjiż, qed jistieden lill-Gvern biex jikkunsidra illi l-pajjiż, il-Gvern, inaqqas is-sostenn li qed jagħti lill-familji fil-qasam tal-enerġija. Dik m’hijiex se ssir. Aħna qatt ma emminna li dik hija d-direzzjoni t-tajba. Dejjem emmina illi kruċjali li nibqgħu nsostnu fil-prezzijiet tal-enerġija u l-fjuwil sakemm huwa meħtieġ, imma parallelment ukoll qed insaħħu l-investiment fir-rinnovabbli, inkluż bi proċess li se jkun qed jitnieda biex pajjiżna jkollu installazzjonijiet ta’ pannelli solari u wind farms ’il barra minn xtutna.”
