F’partita li naqset milli tilħaq l-aspetttativa, Balzan għelbu lil Gudja United bl-iskor minimu ta’ 1-0.
Kienu Balzan li ħarġu fuq l-offensiva u wara biss erba’ minuti, xutt imdawwar u ċentrali ta’ Aleksa Andrejic ġie salvat minn mal-art mill-goalkeeper ta’ Gudja, Glenn Zammit. Erba’ minuti biss wara, Alex Satariano dejjem għal Balzan kellu xutt sabiħ li ġie salvat tajjeb minn Glenn Zammit. Huma komplew fuq l-offensiva u fil-11-il minuta, freekick insidjuż ta’ Andrejic ġie imxellef minn De Sousa, iżda Glenn Zammit salva tajjeb.
Man-nofsiegħa logħob, Alex Satariano approfitta minn żball difensiv ta’ Gudja, għadda tajjeb lejn Matheus De Sousa li mill-viċin tefa’ l-ballun f’lasta vojta.
Fil-ftuħ tat-tieni taqsima, kien biss fid-69 minuta li ġiet innutata l-ewwel azzjoni denja ta’ nota, b’Balzan joħolqu l-periklu meta Andrejic qabeż tajjeb lil Neil Tabone, indirizza cross lejn Marcus Grima li kellu l-konklużjoni tiegħu minn barra l-kaxxa tintemm għoli.
Balzan komplew jamministraw il-vantaġġ minimu li kellhom sa tmiem il-partita biex eventwalment rebħu 1 – 0.
Referee:- Philip Farrugia
Plejer tal-logħba:- Matheus De Sousa
