Uffiċjali tad-Dwana nterċettaw erbgħin kilogramma ta’ droga kokaina f’kontejner li kien fi triqtu mill-Puerto Rico lejn il-Kajr fl-Eġittu.
Il-kokaina nstabet f’erbgħin pakkett, li kull wieħed minnhom kien mimli b’madwar kilogramma tan-narkotika, moħbija f’kompartament fil-kontejner.
Il-kontejner kien qed iġorr kunsinja ta’ prodotti mediċi.
F’dawn l-aħħar snin, id-Dwana ta’ Malta rreġistrat diversi suċċessi fil-ġlieda kontra t-traffikar tal-kokaina.
Fl-2019 inqabdu rekord ta’ seba’ mija u ħamsin kilogramma fi tlettax-il qabda, fl-2020 sitt mija u tnax-il kilogramma f’qabda waħda, fl-2021 seba’ mija u erbgħin kilogramma f’qabda waħda, u s-sena li għaddiet tmien mitt kilogramma u elf, erba’ mija u erbgħa u disgħin kilogramma f’żewġ qabdiet separati.
