Is-sewwieq malti taż-żwiemel Matthew Mallia qed jieħu sehem fl-edizzjoni amerikana tal-Golden Buckle. L-avveniment qed isir f’Waco Texas u Vella se jingħaqad ma’ madwar elf sewwieq ieħor mill-Amerka u l-Ewropa sabiex jikkompeti f’din il-kompetizjoni prestiġġjuża.
F’Ottubru li għadda Malta kienet ospitat l-avveniment tal-Golden Buckle f’Ta’ Qali. Kompetizzjoni internazzjonali li fiha jieħdu sehem madwar 200 żiemel b’sewwieqa ġejjien mill-Ewropa u l-Amerka. Avveniment li għandu udjenza ta’ kważi 30 miljun spettatur.
Fil-kompetizzjoni li qed issir f’Texas, u li hi mifruxa fuq erbat’ijiem, għall-ewwel darba sewwieqa ewropej se jkunu qed jikkompetu direttament ma’ sewwieqa amerikani għall-Golden Bucke Cup. Tmien sewwieqa mill-Ewropa irnexxielhom jikkwalifikaw għal din il-kompetizzjoni wara li kisbu l-aħjar tmien ħinijiet fi tliet kategoriji differenti waqt l-attivita’ li kienet saret f’Malta f’Ottubru. Fost dawn it-tmien sewwieqa ewropej hemm il-malti Matthew Mallia.
Mallia qed jieħu sehem fl-Open 4D Category bid-debba amerikana DTF Miss America. Mallia qed jieħu sehem bl-għajnuna ta’ Equestri Malta.
Ta’ nota li l-kumpanija maltija ta’ avvenimenti tal-massa NRGY Concepts Ltd qed tieħu ħsieb l-organizazzjoni tal-kompetizzjoni f’Texas. Din hija l-ewwel darba li kumpanija maltija ġiet mistiedna sabiex tieħu ħsieb l-immaniġjar ta’ avveniment internazzjonali hekk kbir.
Bħalissa għaddejja diskussjonijiet sabiex dan l-isport jikber dejjem aktar fpajjiżna. Sewwieqa professjonali amerikani u ewropej qed joffru s-servizz tagħhom sabiex iħarġu lis-sewwieqa maltin bil-għan li tiżdied aktar il-parteċipazzjoni.
