Il-prinċipji fundamentali li huma fil-qalb tal-ordni ċivilizzata internazzjonali qegħdin hemm biex jiġu rrispettati minn kulħadd.
Dan kien l-appell tal-President ta’ Malta, George Vella, fl-indirizz tiegħu lill-Korpi Dixxiplinati fl-okkażjoni tal-iskambju tradizzjonali tal-awguri għas-sena l-ġdida li sar fil-Palazz tal-President fil-Belt Valletta.
Meta kien qed jitkellem fil-kuntest tal-gwerra fil-Lvant tal-Ewropa, saħaq li Malta se tkompli twassal messaġġ ta’ għaqda u solidarjetà, anki bil-pożizzjoni tagħha fil-Kunsill tas-Sigurtà tan-Nazzjonijiet Uniti matul is-sentejn li ġejjin.
Qal, “I ask you, Ambassador Melnyk, to convey strong solidarity with President Zelensky and the people of Ukraine, on my behalf and on behalf of the people of Malta.”
Lil hinn mil-gwerra fl-Ukrajna, il-President innota kif anki r-reġjun tal-Mediterran għadu fil-mira tal-kunflitti.
Qal li Malta se tibqa’ toffri l-id tal-għajnuna f’inizjattivi maħsuba biex jikkonsolidaw id-demokrazija, jiksbu t-tkabbir ekonomiku, u jżidu l-aċċess għall-edukazzjoni u l-opportunità ta’ mobilità.
Qal, “Our agenda is one – we wish to see our neighbours thrive and flourish – for the benefits of their own peoples. We wish to see them benefit from their natural resources to reach a better quality of life. We wish them to ensure that their country’s interests come first and foremost. This is a vision and vocation to which we have been committed, are committed and will remain committed.”
Il-President ta’ Malta saħaq li kulħadd irid jaħdem flimkien biex terġa’ tinbena l-fiduċja bejn il-pajjiżi u l-komunità internazzjonali.
Huwa ħeġġeġ lill-Korp Diplomatiku biex isegwi l-aġenda ta’ Malta fil-Kunsill tas-Sigurtà tan-Nazzjonijiet Uniti, li se tagħmel minn kollox biex b’mod trasparenti u xprunata minn prinċipji u valuri ta’ solidarjetà, taħdem favur il-paċi dinjija.
Intant, waqt il-bdil tal-awguri għas-sena l-ġdida, in-Nunzju Appostoliku għal Malta, Savio Hon Tai-Fai, lihuwa wkoll id-Dekan tal-Korp Diplomatiku f’Malta, faħħar lil pajjiżna u s-sbuħija naturali li joffru l-gżejjer Maltin.
Semma wkoll l-irwol ta’ Malta fil-Kunsill tas-Sigurtà tan-Nazzjonijiet Uniti tul is-sentejn li ġejjin u qal li dan huwa ċans storiku biex Malta tkompli twassal messaġġ dwar il-valuri li tħaddan.
Preżenti għal dan l-iskambju kien hemm ukoll il-Ministru għall-Affarijiet Barranin u Ewropej, Ian Borg.
