ARA: Qabda rekord ta’ lampuki – 550 kaxxa minn lanċa waħda, u ħut li jiżen 20 kilo

Fil-Marfa daħal ammont sabiħ ta’ lampuki, liema ħut inqabad minn diversi sajjieda. Fosthom kien hemm lanċa b’550 kaxxa mimlija lampuki.

ONE News huwa informat li ħut minnhom jiżen saħansitra 20 kilo. Sajjieda qalu li kien ilu ma joħroġ temp tajjeb, jew ‘temp galbu’, kif jissejjaħ fost is-sajjieda stess. It-temp sabiħ li għamel fil-jiem li għaddew irriżulta f’qabda tajba ħafna, li qed tkun ikkonsidrata waħda rekord għal dan iż-żmien tas-sena.

F’kumment fuq il-mezzi soċjali, is-Segretarju Parlamentari għas-Sajd, l-Akwakultura u d-Drittijiet tal-Annimali Alicia Bugeja Said qalet “Nieħu gost nara li s-sajjieda jkollhom suċċess biex ikunu jistgħu jibqgħu jinvestu u jkabbru l-operat tagħhom.”