Il-President Pollakk qal li m’hemm l-ebda sinjal li l-missila li laqtet it-territorju Pollakk tard ilbieraħ kienet parti minn attakk intenzjonat.
Il-President Duda qal li huwa “probabbli ħafna” li l-isplużjoni ta’ missili kienet ikkawżata mid-difiżi tal-ajru tal-Ukrajna.
Żewġ persuni nqatlu wara li missila niżlet fil-Lvant tal-Polonja qrib il-fruntiera tal-Ukrajna, wara mewġa ta’ attakki Russi madwar l-Ukrajna.
Il-Prim Ministru Ingliż Rishi Sunak qal li r-Renju Unit u l-alleati tiegħu kienu qed jippruvaw jistabbilixxu l-fatti dwar l-isplużjoni.
Il-President tal-Istati Uniti Joe Biden qal li kien “improbabbli” li l-missila ġiet sparata mir-Russja. Ir-reazzjoni Amerikana kisbet tifħir rari mir-Russja – b’kelliem għall-Kremlin jiddeskriviha bħala “professjonali”.
L-alleanza militari tan-NATO – li l-Polonja hija parti minnha – qed torganizza konferenza stampa wara laqgħa ta’ emerġenza.
