It-tabib personali ta’ Karmenu Mifsud Bonnici, Dr Edward Cherubino, se jibqa’ jiftakar lill-eks Prim Ministru bħala bniedem umli u li dejjem iġib l-ewwel ir-rispett lejn ħaddieħor. Bniedem tal-ġabra u tar-ruħ, tant li l-aħħar mumenti ta’ ħajtu fl-isptar, għaddihom jitlob ma’ qrabatu.
“Fil-ġabra tal-familja, xi ħaġa sabiħa ħafna. Il-familja kollha mdawrin miegħu. Ħuħ, neputijiet, l-Arċisqof ukoll. Kulħadd jitlob u hu, allavolja ma tantx kien f’sensih, il-ħin kollu jitlob u jitlob u jsemmi l-Madonna u jgħid l-Ave Maria u kollox.”
Dr Cherubino qasam ma’ One News esperjenzi li kellu ma’ Karmenu Mifsud Bonnici, u li jixhdu l-qalb tajba ta’ Mifsud Bonnici. Fost dawn kien hemm l-insistenza tiegħu li, jekk jiġi bżonn li jmur l-Emerġenza tal-isptar, ma jiġix ittrattat b’mod privileġġjat.
“Kien jgħidli, ‘Jekk immur l-emerġenza, importanti ma naqbeż lil ħadd, nistenna wara n-nies’. Ma xtaqx dik l-importanza speċjali.”
Hu qal li kull darba li kien iżuru kien jistaqsih jekk hemmx xi ħadd fil-bżonn. Sa ftit jiem qabel ma’ miet, it-tabib żar lil Mifsud Bonnici u dan saħansitra ried jagħmillu kafe’.
“Qalli, ‘Mhux jien l-importanti, kulħadd all right? Hawn xi pazjent għandu bżonn xi ħaġa? Aqdi lilhom, taqdix lili.’”
It-tabib Cherubino qal li ltaqa’ ma’ Mifsud Bonnici wara li pazjent tieħor tiegħu, il-Maġistrat Joe Mifsud, irreferieh għandu.
Qal ukoll li, meta kellu 18-il sena, kien iżur il-politiċi Maltin sabiex jikkollezzjona l-firem, inkluża dik ta’ Mifsud Bonnici.
“Kien offrieli wiski, u ammont sew ta’ wiski. Dak iż-żmien lanqas kont nixrob – għadni sal-lum ma tantx nixrob il-wiski – u għidtlu, ‘Ma nixrobx, grazzi’. Kien hemm ħija miegħi u, la tahulna, trid tixorbu! Tazza kbira għalija, mhux grokk imma xi ħames grokkijiet, u wkoll għal ħija. Ħija ma jixrobx. Kif dawwar wiċċu niżżiltu u mbagħad ħija qalli, ‘Ixrob tiegħi’. Ma jistax Prim Ministru jagħtik wiski u ma tixorbux, u xrobtu wkoll. Minn dik il-ġurnata ’l hawn ma niftakar xejn! Mort id-dar u rqadt raqda, u qomt l-għada.”
Minkejja li kienu għaddew aktar minn 20 sena minn meta mar għandu għall-firma, Karmenu Mifsud Bonnici lit-tabib Cherubino ftakru minn żgħożitu meta dan sar it-tabib tiegħu.
Dr Cherubino rrimarka li Mifsud Bonnici tant kellu memorja tajba li, ftit jiembissa qabel ma għalaq għajnejh, kien qed jirrakkonta b’dettall l-istorja tal-ħtif tal-ajruplan tal-Egyptair f’Malta fl-1985.
