Dan huwa l-ewwel budget minn ħamsa għaliex qatt ma wgħedna kollox lil kulħadd f’daqqa, imma dejjem imxejna bi pjan.
Fil-Parlament, il-Prim Ministru Robert Abela, spjega kif f’dan l-ewwel budget minn ħamsa ta’ din il-leġislatura, beda jitwettaq il-pjan Malta Flimkien, li fih elf proposta li jridu jitwettqu f’ħames snin.
Fil-kuntest tat-tema tal-budget, ċertezza u stabbiltà, Dr Abela fakkar kif mhi se tiżdied l-ebda taxxa, anzi se tingħata rifużjoni tat-taxxa lil kull ħaddiem.
“Kemm għajruna bihom dawn iċ-ċekkijiet. Kemm qalulna li rridu nixtru l-voti. Lill-ħaddiema ngħidilhom, is-sena d-dieħla elezzjoni m’hemmx, imma ċ-ċekk tar-rifużjoni xorta se terġgħu ssibuh fil-letterbox.”
Il-Prim Ministru Robert Abela
F’budget ieħor soċjali, il-Prim Ministru semma lill-familji, li huma fil-qofol tal-miżuri mħabbra.
Semma fost l-oħrajn, iż-żieda fiċ-children’s allowance, iż-żieda ta’ disħgin ewro għal kull wild, u l-laptop b’xejn għal dawk kollha li se jibdew is-sekondarja.
Hawnhekk tkellem fit-tul dwar l-investiment fl-edukazzjoni.
“Bħalma se nibqgħu ninvestu fl-ogħla livelli edukattivi. Qalilna lbieraħ li qatt ma ħmilniha l-Università. B’wieħed u disgħin miljun ewro, illum ninvestu aktar mid-doppju ta’ kemm kontu tinvestu intom fl-Università. Minbarra, li żidna l-istipendji sena wara sena.”
Il-Prim Ministru Robert Abela
Bl-istess mod, dan il-budget jaħseb f’dawk li jixtieq jixtru l-ewwel dar tagħhom.
Filwaqt li elenka lista sħiħa ta’ miżuri li daħħal Gvern Laburista fl-aħħar snin biex għen lill-first time buyers, semma l-iskema ġdida ta’ għaxart elef ewro f’għaxar snin għal min ikun se jixtri l-ewwel dar.
“Din hija prova oħra li dan il-moviment huwa mimli ideat li jistgħu jagħmlu differenza tanġibbli fil-ħajja tan-nies. B’din l-iskema eluf ta’ familji ġodda se jingħataw sostenn ieħor b’saħħtu mal-ħafna li daħħalna fis-snin li għaddew. Għax irriduhom ikunu f’pożizzjoni li jibdew il-ħajja ġdida tagħhom. Għalhekk magħna taf fejn qiegħed.”
Il-Prim Ministru Robert Abela
Bil-miżuri kollha mħabbra, dan huwa budget ieħor li jaħseb f’kulħadd, li jieħu ħsieb il-kwalità tal-ħajja ta’ kull ċittadin, irrispettivament mil-liema faxxa tas-soċjetà ġej.
