Għaddejjin l-aħħar preparamenti biex is-Sibt, fil-belt kapitali jittella’ wieħed mill-akbar avvenimenti f’pajjiżna wara s-sajf, in-Notte Bianca.
Fil-Mużew Nazzjonali tal-Arkeoloġija, ONE News segwa l-provi ta’ waħda miż-żifniet uniċi nklużi fil-programm vast tas-Sibt filgħaxija.
Id-Direttur Artistiku tan-Notte Bianca, Antoine Farrugia qalilna kif dan l-avveniment jiċċelebra dak kollu li huwa artistiku.
Qal, “Bħalissa qed niffinalizzaw wieħed mill-aktar xows importanti, UNITE. Dan huwa esperiment fiż-żfin kontemporanju mħallat ukoll ma’ moda, bejn pajjiżi varji. L-artisti m’humiex kollha Maltin u aħna nkunu attenti biex fin-Notte Bianca ma nagħmlux dak li hu entertaining biss imma dak li huwa artistiku.”
Għan-Notte Bianca ta’ din is-sena se jieħdu sehem mal-ħames mitt artist f’ħamsin attività, filwaqt li bħalma ġara f’edizzjonijiet tal-passat, mistennija jattendu eluf ta’ nies.
Ta’ min ifakkar ukoll kif persuni bi bżonnijiet speċjali li għandhom fil-pussess tagħhom il-blue badge, se jkunu jistgħu jaqbżu l-kju.
Is-servizz ta’ tal-linja se jkun b’xejn għal kull min għandu t-Tallinja Card. Wara l-ħdax ta’ billejl, se jsiru vjaġġi kull nofs siegħa għal madwar il-pajjiż kollu.
Id-dettalji kollha bil-programmi jinsabu fuq is-sit festivals.mt jew il-paġna ta’ Facebook Notte Bianca Valletta.
