Suċċess u midalji għat-tfal Maltin fis-17-il edizzjoni tal-Logħob Ewropew tat-Tfal fl-Atletika li saru f’Brno, fir-Repubblika Ċeka. Il-Maltin, ta’ età bejn 11 u 15-il sena, ingħaqdu ma’ aktar minn 1,800 parteċipant minn pajjiżi oħra inkluż nazzjonijiet ferm akbar bħall-Italja, il-Polonja u l-Kroazja.
Malta kienet preżenti b’kontinġent b’saħħtu ta’ 48 tifel u tifla, minn ħames klabbs lokali. L-akbar rappreżentanti kienu Rush AC u Pembroke Athleta li kellhom 18 u 15-il atleta rispettivament, bil-bqija jkunu atleti tat-timijiet ta’ La Salle, Aloysians u Zurrieq Wolves.
Id-delegazzjoni temmet dan il-Logħob b’għadd ta’ prestazzjonijiet mill-aqwa, kumplimentati b’tmien midalji f’avvenimenti mill-aktar kompetittivi. Meta wieħed iqis is-saħħa tal-atleti li ħadu sehem f’Brno, dan ir-riżultat ċertament huwa prova oħra tat-titjib fl-atletika Maltija fl-aħħar snin u jawgura tajjeb għall-prospetti tal-atletika Maltija.
Ċertament li dawn il-ġranet se jibqgħu għal żmien twil fil-memorji ta’ Thea Parnis Coleiro u Matthew Azzopardi. Parnis Coleiro (Rush AC) mhux biss rebħet il-midalja tad-deheb fis-60m u ġiet it-tieni fil-long jump iżda ngħatat ukoll il-premju tal-aqwa prestazzjoni f’dawn il-Logħob fl-età tagħha. L-istess rikonoxximent intrebaħ minn Matthew Azzopardi ta’ La Salle fil-kategorija 2009 wara deheb fit-800 metru li rebaħ f’ħin rekord għal kategorija tiegħu (U14).
Il-bandiera Maltija ngħatat kull ġieħ b’riżultati tajbin ħafna inkluż deheb għal Nick Bonett (Pembroke) fit-tellieqa tal-150m filwaqt li Luca Gerada (Rush AC) kiseb il-fidda fil-javelin u bronż fix-shotput. F’żewġ tlielaq eċitanti, Malta kienet fuq il-podju fiż-żewġ 4×60 relays fl-Under 14, b’fidda għas-subien u bronż għall-bniet. Għas-subien, bi kwartett kompost kollu minn atleti ta’ Pembroke, dan kien ukoll rekord tal-kategorija. Rekord ukoll għal grupp imħallat tal-4x300m fl-Under 16, din id-darba ffurmat minn atleti ta’ Rush AC.
Numru ta’ atleti Maltin oħra waslu fil-finali tal-kompetizzjoni rispettiva, bi ftit minnhom jonqsu milli jitilgħu fuq il-podju verament bi ftit. Dawn jinkludu lil Thea Shoemake (Rush AC), Bianca Shoemake (Rush AC), Kristina Azzopardi (Pembroke), Zach Mansaray (Rush AC), Kayla Slack (Rush AC), Elya Azzopardi (Pembroke), Viola Pizzolato (Rush AC) u Mireya Bugeja (Zurrieq).
