Clive Ebejer u Juleanne Vassallo tat-Team Greens huma c-champions Nazzjonali ġodda tar-Road Race organizzat mill-Federazzjoni Maltija taċ-Ċikliżmu. Dan kien suċċess doppju għat-Team Greens bħal ma ġara wkoll fil-Kampjonat tat-Time Trial. Clive Ebejer irnexxielu jagħmel dan meta rebaħ l-aħħar tiġrija li nżammet fiċ-ċirkwit tax-Xħajma, fin-Nadur, Għawdex meta temm it-tnax il-lap tiegħu f’ħin ta’ 1:34:03.00. Warajh spiċċaw Matthew Dalli ta’ Agones SFC (1:34:04.02) u Etienne Cutajar tat-Team Greens (1:34:05.45). Fil-klassifika ġenerali Clive Ebejer spiċċa b’total ta’ 485, segwit b’5 punti inqas mill-ex champion Pierre Borg ta’ Mosta AF Sign Studio CC, b’Etienne Bonello tat-Team Greens jispiċċa b’total ta’ 465 punt.
Fil-Kategorija tan-Nisa, Juleanne Vassallo tat-Team Greens spiċċat champion għall-ewwel darba b’total ta’ 550 punt. Fil-klassifika generali, Marquita Muscat ta’ The Cyclist spiċċat it-tieni bi 330 punt u Michelle Vella Wood tat-Team Greens b’280 punt. Intant kienet Marie Claire Aquilina, wkoll tat-Team Greens li rebħet it-tiġrija tan-Nadur meta spiċċat it-8 dawriet tagħha f’ħin ta’ 1:08:49.43. Warajha spiċċaw Juleanne Vassallo (1:14:26.59) u Marquita Muscat (1:18:02.57).
Luke Borg ta’ The Cyclist spiċċa wkoll champion Nazzjonali tal-kategorija ta’ taħt it-23 sena meta spiċċa l-ewwel fil-klassika b’400 punt, warajh fil-klassifika generali spiċċaw żewġ ċiklisti ta’ Birkirkara St Joseph, Daniel Briffa bi 350 punt u Sean Michael Darmanin bi 330 punt. Madankollu t-tiġrija tan-Nadur intrebħet minn Stefan Scerri ta’ Gozo CC meta għamel it-tnax il-dawra tiegħu f’ħin ta’ 1:43:24.25. Warajh spiċċa Daniel Briffa (1:46:54.76).
Justin Gauci (Mosta AF Sign Studio CC) huwa c-champion Nazzjonali tal-Masters 40+ b’575 punt. Warajh spiċċaw Nicholas Schembri (Team Greens) b’530 punt u Ivan Zammit ta’ Birkirkara St Joseph b’485 punt. Intant kien Nicholas Schembri li rebaħ it-tiġrija ta’ Għawdex meta temm it-8 dawriet tiegħu fi sprint finali f’ħin ta’ 1:08:45.08. Bl-istess ħin spiċċa Justin Gauci, filwaqt li Ivan Zammit daħal f’ħin ta’ 1:08:45.25.
Mario Attard tat-Team Greens huwa c-champion Nazzjonali tal-Masters 50+ meta spiċċa f’ras il-klassika b’massimu ta’ 600 punt. Warajh ikklassifikaw żewġ ċiklisti ta’ Mosta AF Sign Studio CC, Kevin Muscat b’505 punt u Emmanuel Camilleri b’155 punt.
Jacob Schembri ta’ Mosta AF Sign Studio CC spiċċa wkoll bħala champion Nazzjonali tal-Juniors b’total ta’ 400 punt. Dareen Sultana ta’ Gozo CC spiċċa t-tieni b’200 punt. L-istess Schembri rebaħ it-tiġrija tan-Nadur meta temm it-12 il-dawra tiegħu f’ħin ta’ 1:44:14.59.
Ishmael Grima ta’ Shamrock Stars spiċċa bħala champion Nazzjonali ta’ taħt is-16 il-sena b’total ta’ 400 punt. Warajh spiċċaw rispettivament Kai Azzopardi ta’ Agones SFC b’200 punt u Matthew Galea (Gozo CC) bi 175 punt. L-istess Grima rebaħ it-tiġrija tan-Nadur meta temm l-4 dawriet tiegħu f’ħin ta’ 40:07.94. Warajh daħal Matthew Galea (48:36.41).
Ryan Gatt ta’ The Cyclist spiċċa bħala champion Nazzjonali ta’ taħt l-14 il-sena b’total ta’ 200 punt. Warajh spiċċa Sean Mercieca ta’ Mosta AF Sign Studio CC b’175 punt. L-istess Gatt rebaħ fin-Nadur meta temm it-tliet dawriet tiegħu f’ħin ta’ 25:56.76. Warajh spiċċa Sean Mercieca (37:19.87).
Liam Daly (Shamrock Stars) spiċċa bħala champion Nazzjonali ta’ taħt it-12 il-sena Subien b’total ta’ 200 punt. Warajh spiċċaw sħabu tal-istess team, Neil Cassar b’175 punt u Isaac Buttigieg b’155 punt. Nina Debono ta’ Shamrock Stars spiċċat bħala champion Nazzjonali ta’ taħt it-12 il-sena Bniet b’total ta’ 200 punt. Warajha spiċċat Katie Vella Wood tat-Team Greens b’175 punt.
Fi tmiem dawn it-tiġrijiet saru l-premjazzjonijiet tal-medalji lir-rebbieħa minn Edward Said, Sindku tan-Nadur li kien assistit minn John Zammit u Joe Bajada, President u Segretarju Ġenerali rispettivament tal-Federazzjoni Maltija taċ-Ċikliżmu.
Fi tmien dawn it-tiġrijiet tal-Kampjonati tagħha, l-Federazzjoni Maltija taċ-Ċikliżmu trid turi l-apprezzament tagħha għaċ-ċiklisti u l-uffiċjali tal-klabbs kollha għas-sehem tagħhom, kif ukoll għal ARRTS Timing System għax-xogħol kbir tagħhom. Grazzi wkoll tmur għas-servizzi rispettivi tal-Kunsilli Lokali, Trasport Malta, il-Puliżija u l-Emergency First Response, kif ukoll lil xi voluntiera, timekeepers u marshalls.
Kreditu tar-ritratti: Alessio Sultana – Kunsill Lokali Nadur, Għawdex
