Fl-ewwel nofs tas-sena n-nefqa fuq il-benefiċċji kontributorji u mhux kontributorji mill-Gvern żdiedet b’aktar minn €45 miljun għal total ta’ €628 miljun meta mqabbel mal-istess perjodu tas-sena l-oħra.
B’hekk mill-2013 ’l hawn, din kienet it-tieni l-akbar żieda fin-nefqa fl-ewwel nofs tas-sena wara dik irreġistrata fl-2017.
F’konferenza tal-aħbarijiet mill-Ministeru għall-Politika Soċjali u d-Drittijiet tat-Tfal intqal li, meta mqabbel mal-ewwel 6 xhur ta’ 10 snin ilu taħt amministrazzjoni Nazzjonalista, din in-nefqa turi żieda ta’ 61 fil-mija, jiġifieri kważi €238 miljun.
Kważi tliet kwarti tan-nefqa globali marret għan-nefqa fuq il-pensjonijiet tal-irtirar, tar-romol, tal-invalidità kif ukoll fuq dawk mhux kontributorji tal-età biex b’hekk b’kollox laħqet is-somma ta’ kważi erba’ mija u sitta u sittin miljun ewro (€465.7 miljun).
Fil-fatt, dawk li jaqgħu taħt dawn il-kategoriji ħadu żieda ta’ €5 fil-ġimgħa filwaqt li, meta mqabbel mal-2020, ħadu żieda ta’ mill-inqas €17-il ewro fil-ġimgħa.
Is-Segretarju Permanenti fil-Ministeru, Mark Musu, poġġa f’kuntest iċ-ċifri ewlenin li ħarġu minn din l-istatistika.
“Iċ-ċifri jikkonfermaw ukoll il-fenomenu tal-aħħar snin, fejn qed ikun hemm tnaqqis fl-ammont ta’ nies li jiddependu għall-għajxien tagħhom fuq l-għajnuniet soċjali, u dan naturalment huwa xi ħaġa pożittiva għaliex aktar u aktar nies qed jaqilgħu l-għajxien tagħhom mix-xogħol aktar milli mill-benefiċċji soċjali.”
Fil-fatt, b’rabta ma’ dan, in-nefqa fuq l-assistenza soċjali niżlet b’madwar €1.5 miljun għax komplew jonqsu dawk li jirċievu l-assistenza soċjali u dawk bla xogħol.
Fl-ewwel 6 xħur tas-sena l-għadd ta’ dawn il-persuni niżel bi kważi disa’ mitt ruħ (868).
Intant, miżura oħra li ħalliet impatt fuq in-nefqa fuq il-benefiċċji mhux kontributorji kienet dik li varat aktar żidiet fl-Għajnuna Supplimenari lill-benefiċjarji miżżewġin u persuni waħidhom, inkluż ir-romol.
Għalkemm l-għadd tal-benefiċjarji naqas b’aktar minn 700, in-nefqa żdiedet bi €2.6 miljun għal €8.6 miljun.
F’din l-istess konferenza tal-aħbarijiet ingħata wkoll rendikont dwar it-twettiq tal-proposti mħabbra fil-Budget għal din is-sena, minn dan l-istess Ministeru.
“Dan il-Ministeru kellu 28 miżura tal-Budget x’jimplimenta u sa issa implimenta 24 minnhom, jiġifieri 86%. L-erbgħa miżuri li fadal se jkunu implimentati wkoll sal-aħħar ta’ Novembru li ġej biex, allura, inkunu lħaqna r-rata ta’ implimentazzjoni ta’ 100%.”
Il-Ministru għall-Politika Soċjali, Michael Falzon, qal li jemmen li t-titjib qawwi li sar fil-benefiċċji kien ta’ tarka għal bosta anzjani u familji. Huwa aċċenna wkoll għall-ħidma biex il-prezzijiet tal-enerġija jibqgħu stabbli u kif din kienet ta’ sostenn importanti biex jilqgħu għall-isfidi li tqanqlu bil-gwerra fl-Ukrajna.
Il-Ministru Falzon irrimarka wkoll dwar il-qabża kbira li għamel pajjiżna minn żmien amministrazzjoni Nazzjonalista f’dan il-qasam, biex illum fil-qasam soċjali l-Gvern qed jonfoq nefqa rekord.
“In-nefqa li għandna din is-sena fuq il-benefiċċji soċjali hija rekord. Jiġifieri qed naraw li se nħallsu s-somma ta’ €1.3 biljun. Jagħtik sodisfazzjon li, l-ewwel nett, pajjiżna għandu l-ikbar numru ta’ nies fid-dinja tax-xogħol u jagħtik sodisfazzjon kbir ukoll li qegħdin naslu. Għax illum għandna inqas minn nofs il-persuni li jiddependu fuq l-għajnuna soċjali għall-għajxien tagħhom milli kellna fl-2013.”
F’messaġġ li tella’ fuq il-paġna tiegħu fuq il-facebook, il-Prim Ministru u mexxej Laburista, Robert Abela, fakkar fid-diversi miżuri tal-Baġit, partikolarment dawk li bihom issaħħu l-pensjonijiet. Huwa qal li, sena wara oħra, il-Gvern baqa’ jara li jsaħħaħ id-dħul tal-pensjonanti, li huma fost l-iktar li jeħtieġu attenzjoni.
