It-team nazzjonali malti tal-irġiel tar-Rugby League tela’ mal-ewwel għaxar postijiet fir-rankings internazzjonali. Fl-aktar rankings riċenti, ippublikati l-Ġimgħa filgħodu, t-team malti jinsab fl-għaxar pożizzjoni fid-dinja.
Riżultat eċċezjonali għar-Rugby League, iżda fuq kollox għall-isport lokali. Fl-ewwel għaxar pożizzjonijiet hemm pajjiżi kbar u bi storja kbira f’dan l-isport. Fl-ewwel post hemm New Zealand, segwieti minn Tonga u l-Ingilterra.
Ir-rankings jiġu maħduma skond ir-rżultati miksuba mit-timijiet fl-istaġun attwali u anke fiż-żewġ staġuni ta’ qabel. Malta avvanzat ħames postijiet mill-15-il post li kienet fih fir-rankings ta’ qabel.
Ir-Rugby League malti għandu taħlita ta’ plejers maltin kif ukoll oħrajn li jgħixu u jilgħabu barra minn xtutna. Team malti li huwa attiv ħafna fl-Awstralja fejn jiġi segwiet minn bosta maltin li jgħixu hemm.
Lokalment isru wkoll kompetizzjonijiet matul ix-xhur tas-sajf.
