Meta t-Tlieta filgħaxija intlagħbet it-tlettax -il ġurnata tal-kampjonat tal-1 diviżjoni tal-Federazzjoni Boċċi, it-tliet timijiet ta’ fuq rebħu l-logħbiet rispettivi.
Għaxaq, Msida u Żebbuġ baqgħu jokkupaw l-ewwel post tal-klassifika. Għaxaq dawru telfa f’rebħa meta barra minn darhom għelbu lil Lija 21 għal 19. Logħba li kif jixhed ir-riżultat kienet waħda kumbattuta fejn it-tim ta’ Lija kellu vantaġġ ta’ 9 punti meta kienu qed jirbħu 16 ma’ 5. Iżda t-tim ta’ Għaxaq wettaq reazzjoni inkredibbli u rebaħ il-logħba.
Msida barra minn darhom għelbu lil St Peter’s Żabbar 21 ma’ 7, b’dawn tal-aħħar jieħdu daqqa fit-tentattiv li jaghmluwha mal-ewwel erba’. Min-naħa tagħhom Żebbuġ ingħataw rebħa ta’ 21 għal 0 kontra Paola.
Buġibba telgħu waħedhom fir-raba’ post grazzi għar-rebħa li kellhom fuq Żabbar bl-iskor ta’ 21 għal 5 u anke għat-telfa ta’ St peter’s Żabbar.
F’riżultati oħra, Żurrieq ingħataw rebħa ta’ 21 għal 0 kontra Isla. Qormi San Bastjan żammew it-tamiet tagħhom li jistgħu jaghmluwha għar-raba’ post u għalhekk għall-play offs meta barra minn darhom rebħu lil Marsamxett 21 ma’ 14.
Il-kampjonat tal-1 diviżjoni se jkun qed jara lill-ewwel erba’ timijiet jgħafddu għall-play offs fejn l-ewwel fil-klassifika jilgħab kontra t-tim fir-raba’ post, filwaqt li minn jiħi t-tieni jilgħab kontra t-tim fit-tielet post. Ir-rebbieħa imbgħad jilgħabu l-finali għar-rebħ tal-kampjonat.
