Tliet snin ħabs wara li ammetta li kien kompliċi fil-ħtif ta’ tifla ta’ seba’ snin

Raġel ta’ 34 sena mis-Somalja ngħata sentenza ta’ tliet snin ħabs wara li nstab ħati għal bosta akkużi, fosthom li kien kompliċi biex tifla ta’ seba’ snin tinħataf minn ommha u tittieħed barra minn Malta.

Mohamed Said Ahmed ġie akkużat ukoll li għen bosta persuni sabiex jidħlu u joħorġu minn Malta.

Huwa ammetta l-ħtija għall-akkużi miġjuba kontrih, u l-Qorti ordnat li jintbagħat tliet snin ħabs u jiġi mmultat €2,300, flimkien ma’ €1,620 fi spejjeż tal-esperti tal-Qorti.