Raġel ta’ 32 sena minn Marsaxlokk se jitressaq il-Qorti għall-ħabta tat-3pm u jiġi mixli bi traffikar tad-droga.
Ir-raġel ġie arrestat it-Tnejn filgħaxija waqt operazzjoni li saret mill-Pulizija mill-Iskwadra ta’ Kontra d-Droga, b’rabta ma’ traffikar u importazzjoni tad-droga lejn Malta minn Sqallija.
Il-Pulizija kienu qegħdin isegwu l-movimenti ta’ dinghy.
Kien għall-ħabta tas-7pm xħin il-Pulizija ċċirkondaw id-dinghy hekk kif trakka ma’ moll f’Dellimara.
Fuq id-dinghy kien hemm ir-raġel u, minn tfittxija li saret, instabu erba’ kilo kannabis, li l-valur fit-triq tagħhom ilaħħaq iktar minn €100,000.
Ir-raġel se jidher quddiem il-Maġistrat tal-Għassa Caroline Farrugia Frendo filwaqt li l-inkjesta qed titmexxa mill-Maġistrat Victor Axiak.
Ritratt: Uffiċċju tal-Komunikazzjoni, Il-Korp tal-Pulizija ta’ Malta
