Fi stqarrija l-Partit Laburista qal li r-reazzjoni isterika ta’ Jason Azzopardi għat-tħabbira ta’ aktar informazzjoni, din id-darba ġuramentata, b’rabta mal-każ tal-art f’Ħal Qormi turi l-istat ta’ paniku li għandhom Simon Busuttil u wieħed mid-deputati ewlenin tiegħu dwar każ skandaluż li dwaru l-Awditur Generali bi kliem mill-iktar iebes qal li x-Shadow Minister tal-Ġustizzja, Demokrazija u Drittijiet taċ-Ċittadini Jason Azzopardi għandu jerfa’ responsabbilta’ politika.
L-istqarrija tgħid li flok jipprova jagħmel is-sarimi permezz tad-deputati tiegħu, ikun aħjar għal Simon Busuttil, li fuq ħaddieħor irid jagħmilha ta’ judge & jury, li jgħaddi dan it-test ta’ korrettezza politika li għandu quddiemu u juri l-bieb ta’ barra lil Jason Azzopardi.
Il-PL fakkar li dan hu każ fejn art pubblika stmata iktar minn €8miljuni mill-Awditur stess, spiċċat għand persuna qrib ħafna tal-PN bi ħlas mizeru ta’ ftit iktar minn €700,000 lill-Gvern. Persuna li magħha Azzopardi ltaqa’ u offra lil din il-persuna li jinstab kompromess. Il-kompress kien li l-art tiġi stmata b’valuri ta’ iktar minn għoxrin sena qabel minn Periti li tqabbdu bi qbil bejniethom.
Mitlub jikkumenta fuq ir-reazzjoni ta’ Jason Azzopardi wara l-konferenza tal-aħbarijiet, il-Ministru Owen Bonnici qal, “be my guest”.
