Jinżamm arrestat wara li allegatament seraq mara ta’ 82 sena

Tony Zammit, ta’ 43 sena minn Ħal Qormi baqa’ jinżamm arrestat wara li allegatament seraq ġiżirana ta’ mara ta’ 82 sena.

Huwa tressaq il-Qorti quddiem il-Maġistrat Josette Demicoli l-Ħamis filgħodu, akkużat b’serq aggravat.

Il-Prosekuzzjoni, immexxija mill-Ispetturi Lydon Zammit u Stephen Gulia, spjegat li l-imputat seraq lill-mara nhar it-Tnejn għall-ħabta tas-siegħa u kwart ta’ waranofsinhar. Is-serqa allegatament seħħet fi Triq Cordina Perez, fil-Ħamrun.

Zammit ġie akkużat ukoll li kiser il-kundizzjonijiet tal-ħelsien mill-arrest li ngħatawlu f’żewġ istanzi differenti u li kien riċediv.

Huwa wieġeb li mhux ħati għall-akkużi miġjuba kontrieh u talab għall-ħelsien mill-arrest. Madankollu, il-Qorti ċaħdet din it-talba.