Aktar tard din il-ġimgħa f’pajjiżna, se jibda l-ġbid ta’ film ġdid bl-isem ta’ “Napoleon”, li se tkun produzzjoni ta’ Apple Studios.
Id-Direttur Ridley Scott u l-atturi prinċipali Joaquin Phoenix u Vanessa Kirby mistennija jaslu f’Malta din il-ġimgħa. Joaquin Phoenix se jinterpreta l-parti ta’ Napuljun filwaqt li Vanessa Kirby se tkun martu, Josephine.
Il-ġbid ta’ dan il-film se jsir f’Ħ’Attard, l-Isla, il-Mellieħa, is-Siġġiewi, l-Imdina u l-Belt, fost postijiet oħra bħall-Malta Film Studios fil-Kalkara.
Din se tkun it-tielet darba li Ridley Scott ikun f’pajjiżna, wara l-ġbid ta’ “White Squall” fl-1996 u “Gladiator” fis-sena 2000.
“Napoleon” hija l-ħames produzzjoni li qed tinġibed f’Malta din is-sena, minn swieq Amerikani, Ingliżi, l-Iżvezja u Malta stess.
