F’nofs din il-ġimgħa fi stabbiliment f’Marsaskala ntlagħbet l-ewwel ġurnata tal-Premier League of Darts li fih qed jipparteċipaw l-aqwa plejers tad-darts f’pajjiżna.
Fil-kategorija tal-irġiel hemm għaxar plejers li huma Norbert Attard, Tony Borg, John Agius, Brian Abela, Enrico Scerri, Lawrence Spiteri, Kevin Aquilina, Albert Scerri, Matthew Vella u Eucharist Baldacchino.
Mill-banda l-oħra fis-sezzjoni tan-nisa Althea Ciantar, Amy Abela, Kelly Harvey u Bev Keen qegħdin jikkompetu bejniethom biex fil-jiem li ġejjin waħda minnhom tieħu t-titlu tal-aqwa plejer tad-darts femminili.
Fl-ewwel ġurnata mis-sezzjoni tal-irġiel spikka l-konfront bejn il-missier u l-iben hekk kif Enrico Scerri għeleb lil missieru Albert bl-iskor ta’ 4-3. Min-naħa l-oħra, Norbert Attard, John Agius u Tony Borg spikkaw b’rebħiet identiċi ta’ 4-0 kontra l-avversarji tagħhom. Fis-sezzjoni tan-nisa Amy Abela għelbet lil Kelly Harvey 3-2 filwaqt li Althea Ciantar kisbet rebħa ta’ 3-1 fuq Bev Keen.
Il-logħob ikompli nhar it-Tnejn li ġej bit-tieni ġurnata ta’ dan l-avveniment li qed jerġa’ jirritorna nuqqas ta’ sentejn.
