“Il-pjan tal-Partit Laburista huwa wieħed ta’ Malta isbaħ b’opportunitajiet għal kulħadd.”
F’Dar il-Mediterran, il-Prim Ministru u Mexxej tal-Partit Laburista Robert Abela għamel indirizz b’saħħtu b’viżjoni għal futur ta’ Malta.
Propju waqt il-Konferenza Ġenerali li approvat il-Manifest Elettorali li l-Partit Laburista qed jippreżenta quddiem l-elettorat Malti u Għawdxi għall-elezzjoni ġenerali tas-26 ta’ Marzu, Dr Robert Abela qal kif il-Partit Laburista qed iressaq ’il quddiem pjan li se jkompli jsaħħaħ lil Malta bħala pajjiż li fih tirrenja l-għaqda ta’ familja waħda.
“Fuq kollox – kieku kelli ngħaqqad kollox, f’kelma waħda ngħidilkom x’inhi: Il-familja, Lydia, Giorgia huma ispirazzjoni kontinwa f’ħajti. Illum fdat b’responsabbiltà ta’ familja akbar. U dak huwa li qed inpoġġu quddiemkom illum. Pjan ta’ kif se nibqgħu ntejjbu dan il-pajjiż. Pajjiż li jgħix bħala familja waħda.”
Robert Abela – Prim Ministru ta’ Malta
Il-Prim Ministru qal kif minn dan il-pjan li qed jiġi ppreżentat, se jitfassal pajjiż isbaħ, pajjiż ta’ opportunitajiet indaqs u fuq kollox pajjiż li joffri kwalità ta’ ħajja aħjar.
Quddiem bosta persuni fosthom membri tal-Eżekuttiv, l-Amministrazzjoni u d-Delegati tal-Partit Laburista, Dr. Robert Abela wassal messaġġ ta’ moviment.
Moviment li id f’id u katina waħda fassal pjan biex jibni l-Malta ta’ għada.
“Dan huwa l-moviment li ma jieqafx jiġġedded. Dan huwa l-moviment li ma jieqafx ġurnata waħda jaħseb kif pajjiżna jista’ jkun aħjar, għal uliedna. U jekk jogħġobkom tisilfuni l-fiducja tagħkom, bl-ewwel mandat tiegħi se nara li dan il-pjan jitwettaq, u jitwettaq kollu.”
Robert Abela – Prim Ministru ta’ Malta
Il-Mexxej tal-Partit Laburista qal kif dak li qed jipproponi għall-ħames snin li ġejjin se jkompli jibni fuq il-ħafna tajjeb li ġa sar tul is snin ta’ Gvern Laburista.
Ma naqasx li hawnekk isemmi wkoll kif kien Gvern Laburista li ġab riżultati ferm pożittivi għall-ekonomija Maltija, ħaġa li wasslet sabiex titjieb il-kwalità tal-ħajja ta’ bosta, fosthom il-pensjonanti, iż-żgħażagħ, il-familji u anke n-negozji u ħaddiema.
F’messaġġ ta’ mexxej b’viżjoni, il-Prim Ministru Robert Abela saħaq kif ma nistgħu nieqfu hawnhekk.
“Għalhekk ma nistgħux nieħdu l-affarijiet for granted. Għalina qatt mhu biżżejjed li nilħqu l-aspettattiva tan-nies. Irridu necceduha, kull darba. Dan il-kunċett jestendi għal suġġett importanti ħafna għalija, l-ambjent u li nwasslu pajjiżna li jkun climate neutral. Ħa nuru kif qed nagħmlu tranżizzjoni tal-prijoritajiet tagħna biex insebbħu pajjiżna, u nħaddruh b’aktar spazji miftuħa u ġonna li jistgħu jitgawdew mill-familja.”
Robert Abela – Prim Ministru ta’ Malta
Dr Abela semma wkoll bosta proposti li ġa ġew imħabbra mill-Manifest Elettorali tal-Partit Laburista.
Proposti li fi kliemu se jkomplu jaraw li l-Maltin u l-Għawdxin jgħixu f’pajjiż isbaħ u aħjar.
Il-Prim Ministru qal kif il-Partit Laburista għandu l-pjan ta’ x’pajjiż irridu nħallu għal uliedna.
“Dan il-pajjiż qed jinvesti. U se jinvesti f’uliedna. Dan il-pajjiż huwa wieħed ta’ opportunitajiet. Għax irrid li uliedna – l-istilel ta’ team Malta – ikollhom opportunitajiet indaqs, anzi iva kull tifel u tifla f’Malta trid titlaq mill-istess punt ta’ tluq… sabiex ikunu huma li jieħdu lil pajjiżna fil-livell li jmiss.”
Robert Abela – Prim Ministru ta’ Malta
Robert Abela rrimarka wkoll kif kien Gvern u Partit Laburista li verament emmen f’pajjiż ugwali bi drittijiet indaqs għal kulħadd.
Fi tmiem ta’ diskors b’saħħtu, il-Prim Ministru wassal il-messaġġ ta’ Malta Flimkien, il-Futur Sabiħ.
“Għandi fiduċja li jekk se tagħżel Malta isbaħ, Se tagħżel din il-viżjoni. Fiduċja li jekk se tagħżel Malta ta’ opportunitajiet, Se tagħżel dan il-manifest. Fiduċja li jekk trid kwalità tal-ħajja aħjar, Se tagħżel dan il-ħsieb. Fuq kollhom fiduċja fikom – li tridu ġustizzja u fairness – se tagħżlu dan il-moviment għalhekk tibqax id-dar. Tagħżel x’tagħżel, toqgħodx lura. Oħroġ u vvota. Għax għandi fiduċja fl-għażla tagħkom. Għax flimkien nistgħu nwettqu l-futur! Malta Flimkien għax il-futur sabiħ.”
Robert Abela – Prim Ministru ta’ Malta
