Ġimagħtejn oħra mistennija jibdew jitqassmu ċ-ċekkijiet tar-rifużjoni tat-taxxa u ċekk addizzjonali ta’ mitt ewro jew mitejn ewro jekk inti pensjonant jew fuq il-benefiċċji soċjali, bħala parti mill-irkupru mill-pandemija.
Dan hekk kif bħalissa qed jiġu stampati ċ-ċekkijiet fl-istamperija tal-Gvern.
Xahar ilu, il-Prim Ministru Robert Abela flimkien mal-Ministru għall-Finanzi Clyde Caruana kienu ħabbru investiment fin-nies ta’ sebgħin miljun ewro.
Ma’ ONE News il-Ministru għall-Finanzi qal li b’kollox se jkunu se jitqassmu ħames mija u tmenin elf ċekk.
Il-Ministru Caruana tenna, “F’dak li għandu x’jaqsam ma’ ċekkijiet tal-għoli tal-ħajja hemm żewġ valuri wieħed ta’ mitt ewro li se jkun qed jingħata lill-ħaddiema u lill-istudenti filwaqt li t-tieni wieħed b’valur ta’ mitejn ewro dak se jkun qed jingħata lil dawk li qegħdin fuq xi benefiċċju soċjali jew inkella fuq il-pensjonijiet. Hemmhekk nistennew li bħal lum ħmistax jibdew jaslu l-ewwel ċekkijiet fil-letter boxes.”
Fid-dawl tal-kunflitt li għaddej bejn ir-Russja u l-Ukraina, il-Ministru Caruana ma eskludiex li aktar tard din is-sena jkun qed jitqassam ċekk ieħor.
Huwa qal, “Numru ta’ komoditajiet jiġifieri bħaż-żejt, iċ-ċereali, il-qmugħ, il-ġwież. Dawn l-affarijiet minħabba li jesportawom f’volumm sostanzjali qegħdin jiżdiedu fil-prezz. Jekk kemm il-darba naraw li dawn l-effetti se nkunu qed inħossuhom u jiġu fis-suq tagħna, iva ma neskludiex, il-pajjiż għandu biżejjed riżorsi sabiex jekk ikun hemm il-ħtieġa nerġgħu nagħtu għajnuna lin-nies.”
Il-Ministru qal kif il-Gvern għandu riserva ta’ mitejn miljun ewro, hekk kif kien imħabbar fl-aħħar budget li permezz tiegħu jnaqqas il-piż u l-impatt ekonomiċi tal-kunflitt ta’ bejn ir-Russja u l-Ukraina.
Dawn il-mitejn miljun ewro kienu ġew allokati għal kull eventwalità li tista’ tolqot lill-pajjiż bħal ma kienet il-pandemija tal-COVID-19.
Il-Ministru Clyde Caruana stqarr, “Konna qed nantiċipaw li se jkun hemm xi effetti u filfatt għad ikun hemm tal-Pandemija. Sintendi issa magħhom jingħaqdu wkoll dawk tal-gwerra, għandna dan il-war chest ta’ mitejn miljun ewro li se nkunu qed nużaw biex intaffu u nilqgħu kemm jista’ jkun għal kull impatt negattiv li jista’ jkun ġej minn barra. Bħalissa rridu nkomplu bħal ma konna qed nagħmlu fl-aħħar xhur u snin dak li nipproteġu l-ekonomija u l-bwiet tal-familji Maltin u Għawdxin.”
Caruana temm jgħid li kieku l-Gvern ma ntervjeniex diġà, kieku għal kull għoxrin ewro petrol wieħed irrid iħallas ħamsa u għoxrin ewro u għal kull għoxrin ewro diesel wieħed irrid iħallas sitta u għoxrin ewro.
