Qormi Hockey Club A saħħew l-ewwel post tal-klassifika tal-kampjonat tal-Ewwel Diviżjoni tad-Darts meta ftit sabu diffikulta’ sabiex jegħlbu lil Floriana Ajax B bl-iskor ta’ 8-0. Il-Qriema baqgħu jżommu t-tliet punti vantaġġ fuq l-eqreb rivali ‘Ħamrun Education Men’ li wkoll kellhom rebħa faċli ta’ 7-1 kontra PO’s Bar Gudja. B’hekk tidher li l-ġlieda għall-unuri finali se tkun bejn dawn iż-żewġ timijiet aktar u aktar għax it-timijiet li jinsabu fit-tielet u fir-raba’ post tal-klassifika iġifieri Ħamrun Bayern A u Floriana Ajax A spiċċaw il-konfront ta’ bejniethom fi draw eċitanti ta’ 4-4. Min-naħa l-oħra, Manchester Conquest Pub qed jersqu viċin l-ewwel ħames timijiet fil-klassifika wara rebħa xi ftit diffiċli ta’ 5-3 kontra Sliema Inter DC.
Fil-kampjonat tat-tieni diviżjoni, Fgura Darts B baqgħu jżommu posthom fil-quċċata, b’punt vantaġġ fuq Qormi Hockey B wara rebħa tajba ta’ 6-2 kontra Top Gun Bar.
Sadanittant fil-kampjonat tat-tielet diviżjoni, il-leaders B’Buġia Band Club ma kinux fl-azzjoni. B’hekk it-tim fit-tieni post Beland’s Bull Eye resaq biss punt bogħod minn dawn tal-aħħar wara rebħa ta’ 5-3 kontra Qormi Hornets.
Sadanittant f’nofs il-ġimgħa l-oħra ntlagħab it-tieni round tal-Premier League tad-Darts fejn Enrico Scerri u Lawrence Spiteri ngħaqdu ma’ John Agius u Eucharist Baldacchino għat-tieni fażi ta’ din il-kompetizzjoni wara li rebħu l-konfronti rispettivi tagħhom.
KLASSIFIKA – L-EWWEL DIVIŻJONI Qormi Hockey Club A 25, Ħamrun Education Men 22, Ħamrun Bayern A 17, Floriana Ajax A 16, Manchester Conquest Pub 15, Sliema Inter DC 7, PO’s Bar 3, Floriana Ajax B 0
KLASSIFIKA – IT-TIENI DIVIŻJONI Fgura B 25, Qormi Hockey Club B 24, Ħamrun Bayern B, Whyte Harte 18, Munchies 13, Top Gun Bar 6, Żurrieq FC 3, B’Bugia St Peters 0
KLASSIFIKA – IT-TIELET DIVIŻJONI Banda B’Buġia 20, Beland’s Bull Eye 19, St Pauls Diamonds 16, Qormi Hornets 15, Fgura Darts A 10, Mqabba Tal-Ġilju 7, Mqabba FC Darts 5, Cox Sports Bar 4, Education Bar Ladies 1.
