Wara d-daqqa ta’ ħarta li ħadet l-industrija tal-mużika s-sena l-oħra, is-sena elfejn wieħed u għoxrin riedet tpatti għan-nuqqas li sofriet tul is-sena meta faqqgħet il-pandemija.
Din is-sena rat ir-ritorn ta’ diversi ikoni kbar filwaqt li feġġew artisti żgħażagħ ġodda.
Fil-kumpless ONE, iltqajna mad-DJs popolari fuq ONE Radio, Joe Tanti u John Bundy, li qasmu magħna l-ħsibijiet tagħhom dwar din is-sena mużikali.
Huma tennew, “Fil-mużika pop kien hemm Ed Sheeran, kien hemm Bruno Mars, kien hemm Olivia Rodrigo, Maneskin, Ariana Grande. Dawn kollha kienu hemm. Kien hemm Bieber irritorna bil-kbir. Kien hemm Elton John ma’ Dua Lipa. Il-mix Dua Lipa, dejjem hemm baqgħet. Adele number 1 bestselling din is-sena.”
Wieħed ma jistax ma jsemmix ukoll lill-artista Taylor Swift li tinsab fil-proċess li terġa’ tirrekordja l-mużika kollha tagħha minħabba kwistjoni qalila li kellha meta l-produtur Scooter Braun xtara l-mużika ta’ Swift.
Minkejja dawn il-mużiċisti ta’ fama mondjali u ta’ ċertu esperjenza, għal Tanti u Bundy, kien hemm grupp Taljan li għal kollox biddel x-xena mużikali għal din is-sena.
Qalu, “Kien hemm rivelazzjoni kbira din is-sena li kif tista’ taqbad tgħid, tat xi ħaġa differenti lid-dinja, kienu Maneskin, it-Taljani. Marru l-Eurovision u dawn minn dakinhar ’l hemm faqgħu kull m’hemm fil-fatt bħalissa mifqugħin bil-kunċerti u bit-tours li qed jagħmlu madwar id-dinja kollha. Qed jagħmlu tour mar-Rolling Stones dawn, immaġina.”
Huma nnutaw li anki f’pajjiżna, l-artisti Maltin irrankaw u ġew ispirati biex joħorġu mużika ġdida.
Tanti u Bundy, stqarrew, “Kien hemm anki Malta, affarijiet ġodda Malta kellek l-album il-ġdid tat-Travellers, ir-Red Electrick. Malta kien hemm Matthew James u Kersten Graham ukoll bil-kanzunetti ġodda.”
Meta mistoqsija x’inhi l-aqwa kanzunetta li semgħu din is-sena, Bundy u Tanti ma ħasbux wisq qabel qalulna Zitti e Buoni.
Tennew, “Jien nibqa’ ngħid Maneskin. Anki jien. Nibqa’ ngħid Maneskin.”
Ta’ min wieħed jinnota wkoll il-fenomenu li hija l-app TikTok li kważi kważi qed tagħti kejl ta’ kemm se tkun popolari, kanzunetta, fix-xena mużikali.
Fost l-artisti li sabu xortihom fuq TikTok insibu lil Bella Poarch filwaqt li tat spinta lill-karriera ta’ artisti bħal Lil Nas X u Doja Cat.
