Għal sena oħra, l-istazzjon ONE u ONE Radio ħejjew skeda speċjali għal żmien il-Milied biex dan l-istazzjon iżomm kumpanija lill-familji Maltin u Għawdxin f’dan iż-żmien ta’ festi.
Matul il-ġimgħa, il-ġurnata hi mimlija b’diversi programmi li joqtlu lill-familja kollha, fosthom il-programm Espresso ma’ Wayne Aquilina li se jibqa għaddej anke matul dan iż-żmien, filwaqt li se ikun qed jiġu mxanndra ukoll edizzjonijiet speċjali tal-programm Prime Time mal-preżentatur Owen Bonnici.
L-istazzjon ONE ser ixandar ukoll il-Quddies ta’ Lejliet il-Milied mill-Knisja ta’ San Ġużepp ġewwa Santa Venera.
F’Jum il-Milied, wara nofsinhar, dan l-istazzjon se ikun qed juri kunċert mill-orkesta filarmonika ta’ Malta bis-sehem ta’ Carmine Lauri, filwaqt li wara l-aħbarjiet ta’ seba’ u nofs se tkun qed tixxandar edizzjoni speċjali tal-programm Arani issa.
L-għada tal-Milied, l-istazzjon ONE ser ikun qed ixandar b’mod dirett il-maratona ġbir ta’fondi b’risq il-Fondazzjoni Malta Community Chest Fund, l-Istrina.
It-tlieta tmienja u għoxrin ta’ Diċembru, tim mill-kamra tal-aħbarijiet ta’ ONE ħejja programm speċjali li se jagħti ħarsa lejn is-sena elfejn u wieħed u għoxrin u l-ġrajjiet ewlenin li sawwruha.
Propju fl-aħħar jum tas-sena, l-istazzjon ONE ser ixandar kunċert minn the three tenors, filwaqt li wara, dan l-istazzjon ser ikun qed ixandar b’mod dirett l-ispettaklu ta’ lejliet l-ewwel tas-sena mill-Belt Valletta.
Fl-ewwel jum tas-sena, dan l-istazzjon se ikun qed ixandar il-maratona ‘Festa ta’ Ġenerożità’ mid-Dar tal-Providenza.
ONE Radio ħejja wkoll skeda speċjali għal dan iż-żmien ta’ festi minn programmi ta’ mużika kif ukoll programmi ta’ diskussjoni li jagħtu ħarsa lejn dak li ġara matul din is-sena.
Fost l-oħrajn din is-sena s-semmiegħa kellhom l-opportunità li jgħaddu l-awgurju tagħhom lis-semmiegħa kollha bejn programm u ieħor.
Min-naħa tiegħu, il-Kap ta’ ONE Radio, Clint Bajada semma l-preparamenti li għaddejjin biex din l-iskeda speċjali għal dan iż-żmien festiv iżżomm kumpanija lis-semmiegħa ta’ dan l-istazzjon.
“Lejlet l-ewwel ta’ sena se jkollna l-preżentaturi kollha ta’ ONE Radio li se jagħmlu l-countdown flimkien hawnhekk, jigifiri se ikollna brijju sabiħ, fejn se ntemmu sena li qegħdin fiha bħalissa u nilqgħu s-sena l-ġdida flimkien ma’ ONE Radio.”
