Minn tal-inqas tmien persuni mietu u diversi persuni oħra kienu feruti wara li kien hemm żieda qawwija u f’daqqa ta’ nies f’folla li kienet diġà numeruża waqt il-ftuħ ta’ Astroworld Festival fi Houston fl-istat ta’ Texas.
Uffiċjali tal-emerġenza qalu li qam paniku qawwi hekk kif il-folla bdiet timbotta ruħha lejn il-palk.
Ħdax -il persuna ttieħdu l-isptar isofru minn attakk tal-qalb. Dan filwaqt li tliet mitt persuna ġew megħjuna għal feriti li ġarrbu.
Il-Kap tad-Dipartiment tat-Tifi tan-Nar fi Houston spjega li l-festival attendew għalih ħamsin elf persuna u hekk kif il-folla bdiet tippressa ruħha ‘l quddiem u n-nies bdew jiġu feruti, il-paniku kiber sew.
Huwa mifhum li l-kantant ta’ fama mondjali waqaf diversi drabi matul il-prestazzjoni tiegħu li damet siegħa u kwart hekk kif beda jara lil diversi fanatiċi f’paniku.
