Qraba tal-anzjana li nqatlet minn żewġt iklieb pitbulls, qalu li l-vittma għamlet l-aħħar ġimgħa tgħix mingħajr dawl wara li sid il-kelb beda jisfurzaha biex titlaq mid-dar.
Dan skont xhieda tal-Qorti fil-każ kontra Andre Galea, sid il-kelb li jinsab akkużat bl-omiċidju involontarju ta’ nanntu, Inez Galea ta’ ħamsa u disgħin sena.
Il-patologu forensiku Ali Salfraz xehed li l-vittma mietet b’xokk minħabba telf qawwi ta’ demm wara xi gidmiet mill-klieb.
Xhud ieħor qal li l-klieb kellhom feriti aktarx relatati ma’ ġlied bejn klieb
L-eks Direttur għall-Ħarsien tal-Annimali Noel Montebello ppreżenta diversi rapporti mfassla wara spezzjonijiet li saru fid-dar tal-akkużat, biswit dik tal-vittma, qabel l-attakk.
“Dejjem sibna l-klieb f’kundizzjoni tajba,” qal Montebello.
“Kwalunkwe nuqqasijiet minuri mmarkati lil Galea kienu dejjem indirizzati iżda d-dipartiment qatt ma kien iltaqa’ ma’ xi każ serju ta’ moħqrija tal-annimali”, qal ix-xhud, li kkonferma wkoll li l-klieb kollha kienu reġistrati f’isem l-akkużat.
