Il-Pulizija arrestat żagħżugħ ta’ 23 sena mill-Gżira wara li allegatament spara lejn erba’ fjamingi fil-Qawra.
Il-każ seħħ għall-ħabta tas-7:30 ta’ dalgħodu, meta l-Pulizija rċeviet rapport li fl-inħawi ta’ Fra Ben kienu għadhom kemm ġew sparati tiri fuq tajr protett.
Fi stqarrija l-Pulizija qalet li fuq il-post marru l-Pulizija mis-Sezzjoni tal-Protezzjoni Ambjentali, tar-Rapid Intervention Unit u tad-Distrett.
Fi tfittxija fuq il-post, il-Pulizija sabet arma tan-nar, munizzjon u l-karkassi tal-fjamingi.
Flimkien mal-Pulizija kien hemm membri tal-Forzi Armati ta’ Malta li telgħu tliet fjamingi mill-baħar, filwaqt li ieħor instab fuq il-blat.
Is-suspettat ittieħed id-Depot tal-Pulizija fil-Furjana u għadu qiegħed jinżamm għal aktar stħarriġ.
Ara wkoll:
