Il-ħbieb isiru għedewwa u l-għedewwa jsiru ħbieb. Hekk ġralhom żewġ t’irġiel li kienu ġejjin għoqda f’nofs ta’ triq iżda li wara għamlu ħbieb wara li wieħed minnhom saħansitra tressaq il-Qorti.
Kien fl-għaxra t’Awwissu li Marius Muscat ta’ tmienja u ħamsin sena deher iħebb għal Mario Vella f’filmat li dar fuq il-midja soċjali. Muscat kien ħareġ b’ħadida fi triq fl-Imsida u fera ħafif lil Vella ta’ wieħed u sittin sena. Minkejja li Vella ħafer lil Muscat, il-Maġistrat Donatella Frendo Dimech ikkundannat l-aġir tal-akkużat. Hi poġġietu taħt ordni ta’ probation għal tlett snin sabiex jikkontrolla r-rabja tiegħu filwaqt li ssuġeriet li jerġa’ jattendi kors fis-sewqan.
