Lokali

L-akkużat fl-agressjoni kontra Yana Mintoff ta daqqiet ta’ sikkina lilu nnifsu

minn ONE News
minn ONE News
  • Kien urtat għax riedet titilqu
Gheorghe Popa, ta’ 39 sena, kien akkużat li ta daqqa ta’ sikkina lis-sieħba tiegħu Yana Mintoff Bland, ta’ 65 sena, bint l-eks Prim Ministru Dom Mintoff, u binha Daniel Mainwaring. Dan allegatament għamlu f’dagħdiha ta’ rabja kbira.
Popa, mir-Rumanija, deher quddiem il-Maġistrat Gabriella Vella, liebes papoċċ tas-sodda, qalziet tat-tracksuit u t-shirt. Huwa ttieħed fil-kustodja tal-Pulizija direttament mill-isptar, fejn kien qed jinżamm għall-kura.
L-ispettur Spiridione Zammit qal li akkużat ingħata trattament fl-ITU u ward oħra minn meta seħħ l-inċident. Huwa kien arrestat f’Mater Dei meta kien se jinħareġ mill-isptar. Qabel kien interrogat, kien iċċertifikat medikament tajjeb biex ikun interrogat.
Mintoff Bland u binha, li għandu 32 sena, sofrew ġrieħi għall-ħabta tal-għaxra ta’ filgħaxija nhar l-24 ta’ Ottubru, fid-dar ta’ Mintoff Bland f’Ħal Tarxien.
Mintoff Bland soffriet ġrieħi ħfief f’sidirha u fil-polz, filwaqt li binha qala’ żewġ daqqiet ta’ sikkina, allegatament meta kien qed jiddefendi lill-ommu.
Popa nstab mill-Pulizija moħbi f’siġra wara l-villa ta’ Tarxien, bi ġrieħi taħt żaqqu. Kellhom jissejħu membri mid-Dipartiment tal-Protezzjoni Ċivili fir-residenza, għaliex din ingħatat in-nar.


Skont Joe Giglio, l-avukat ta’ Mintoff Bland, inkjesta maġisterjali sabet li kien ta’ daqqa jew daqqiet ta’ sikkina lilu nnifsu u wara, qabbad id-dar.

Huwa jinsab akkużat li żamm lil Mintoff Bland kontra l-volontà tagħha, li prova jikkaġuna ġrieħi serji lilha u lil binha, li ġarr għodda waqt li kkommetta reat, li ġarr sikkina fil-pubbliku mingħajr il-liċenzja tal-Pulizija, li attakka li Mintoff Bland u lil binha b’sikkina, u li heddidha verbalment.  Kien akkużat li ta fastidju lil Yana Mintoff Bland, li fix-xhur qabel l-allegat reat beżżagħha li se jkun vjolenti fil-konfront tagħha, u li ta n-nar lil residenza.

L-avukat difensur Benjamin Valenzia wieġeb mhux ħati f’isem ir-Rumen, li għada se jagħlaq sninu. Huwa qal li qed jieħu kura psikjatrika, iżda ma kienet preżentata ebda evidenza ta’ dan. Valenzia qal li l-akkużat kien irrifjuta li jieħu l-mediċina.

L-avukat talab li Popa jingħata libertà proviżorja, iżda din ukoll kienet miċħuda għaliex l-indirizz tiegħu huwa l-istess fejn seħħ l-inċident, u l-indirizz li provda lill-Qorti mhux l-istess fejn jgħix fil-verità. L-avukat Valenzia spjega li dak li jħaddem lil Popa kien irranġalu biex ikollu fejn imur jgħix.
L-avukat Giglio qal li l-inċident seħħ għax ir-Rumen kien qed iħossu urtat li Yana Mintoff bland riedet ittemm ir-relazzjoni. L-akkużat kien jemmen li riedet itemmha minħabba nuqqas ta’ lealtà.
TAGS
Avatar photo

Stay Connected on Subscribed