Heritage Malta nediet skema ġdida ta’ sħubija li permezz tagħha membri tal-aġenzija nazzjonali se jgawdu minn inizjattivi u benefiċċji ġodda.
Din l-inizjattiva minn Heritage Malta waslet ftit ġimgħat wara li l-aġenzija nazzjonali varat skema ġdida ta’ sħubija għall-istudenti tal-iskejjel primarji. L-għan ewlieni tal-iskema l-ġdida għall-membri huwa li jissaħħaħ in-numru ta’ viżitaturi lokali fil-mużewijiet u siti taħt ir-responsabbiltá ta’ Heritage Malta.
Bl-iskema preżenti membri ta’ Heritage Malta jistgħu jżuru l-mużewijiet u s-siti kollha ta’ Heritage Malta bla ebda restrizzjoni bl-eċċezzjoni tal-Hypogeum li iżda l-membri jibbenefikaw minn 50% mill-prezz tad-dħul. Benefiċċji oħra huma skont mill-ħwienet ta’ Heritage Malta, skont fuq il-prezz tal-attivitajiet organizzati mill-aġenzija nazzjonali kif ukoll igawdu minn attivitajiet organizzati esklussivament għall-membri.
Bl-iskema l-ġdida ta’ sħubija, membri ta’ Heritage Malta se jgawdu minn inizjattivi immirati lejn udjenzi varji. L-iskema l-ġdida ta’ sħubija tolqot firxa usa’ ta’ kategoriji fejn il-membri se jkunu jistgħu jissieħbu għal sena, tliet snin jew ħames snin. Fost l-inizjattivi l-ġodda, membru bi sħubija ta’ adult jew koppja jista’ jkun akkumpanjat minn sitt itfal li jidħlu b’xejn.
Barra minn hekk tfal tal-membri minn 12-il sena ‘l fuq jistgħu jitolbu għat-tessera tagħhom u b’hekk ikunu liberi jżuru l-mużewijiet u siti b’mod indipendenti. Permezz ta’ dan it-tibdil ukoll, it-tessera tas-sħubija tista’ tiġi trasferita lin-neputijiet jew ħbieb tan-neputijiet. Rigward il-kategoriji varji ġodda, bi sħubija ta’ tliet snin membru jibbenefika minn 15-il biljett b’xejn u jista’ jqassamhom lil qraba jew ħbieb filwaqt li membri bi sħubija ta’ ħames snin jibbenefikaw minn 30 biljetti b’xejn.
Il-prezzijiet tas-sħubija se jkunu hekk:
· adult 18-59 sena: €45 ghal sena, €110 għal 3 snin, €185 għal 5 snin;
· koppja 18-59 sena: €80 għal sena, €195 għal 3 snin, €325 għal 5 snin;
· 60+/persuna b’diżabbilità/student €35 għal sena, €85 għal 3 snin, €140 għal 5 snin;
· koppja 60+/b’diżabbilità/student €60 għal sena, €150 għal 3 snin, €245 għal 5 snin.
