Il-Kap Nazzjonalista Simon Busuttil għandu jaġġixxi quddiem każijiet li qed jiffaċjaw Deputati Nazzjonalisti. Qalu dan il-Ministru Edward Zammit Lewis u d-Deputat Laburista Luciano Busuttil waqt konferenza tal-aħbarijiet.
Dan b’rabta mal-investigazzjoni li qed jagħmlu l-Pulizija Żvediża b’rabta ma’ fond li tiegħu Tonio Fenech huwa Direttur, kumpanija li ħadet flus minn ħalq pensjonanti Żvediżi b’mod frodulenti, bl-ammont ilaħħaq mal-mitejn u erbgħin miljun ewro. Kif ukoll l-każ tal-Viċi Kap Nazzjonalista Beppe Fenech Adami li kien Direttur ta’ kumpanija fiduċjarja li kienet tmexxi l-interess ta’ CapitalOne, kumpanija li allegatament qed tiġi investigata fl-Olanda b’rabta ma ħasil ta’ flus li ġejjien minn traffikar tad-droga.
Dr Zammit Lewis saħaq li mingħajr ma wieħed jidħlu fil-mertu tal-każ biex ma jkunx hemm preġudizzju, xorta huwa l-obbligu tal-Partit Laburista li jikkumenta fuq dak li ħareġ fil-mezzi tax-xandir. Fuq dan il-punt il-Ministru rrimarka li filwaqt li l-Gvern u l-Partit Laburista qed ikunu attenti għax hemm investigazzjoni bit-3 imħallfin fil-każ ta’ Beppe Fenech Adami u investigazzjoni mill-Pulizija Sżvediża fil-każ ta’ Tonio Fenech, Simon Busuttil ħareġ jiddefendihom mill-ewwel. Il-Ministru għat-Turiżmu fisser kif iż-żewġ każijiet huma delikati ħafna, fil-każ ta’ Tonio Fenech il-każ idur ma’ abbuż ta’ pensjonijiet u allura abbuż tal-iktar nies vulnerabbli tas-soċjetà filwaqt li fil-każ ta’ Beppe Fenech Adami, il-Viċi Kap Nazzjonalista huwa wieħed mid-diretturi ta’ kumpanija li tissemma f’allegat każ ta’ ħasil ta’ flus u drogi, drogi li qerdu tant żgħażagħ u kisru familji.
Edward Zammit Lewis tenna li Simon Busuttil qed jiddefendi aġir li llum jinsab taħt investigazzjoni fejn semma kif fil-każ ta’ Tonio Fenech, inħarġet stqarrija uffiċjali mill-Partit Nazzjonalista fuq kwistjoni li hija ta’ Tonio Fenech. Li huwa zgur huwa li Simon Busuttil ma jistax jittieħed bis-serjetà meta jkollu każijiet bħal dawn u jibqa’ ċass quddiemhom.
Min-naħa tiegħu d-Deputat Laburista Luciano Busuttil saħaq li peress li fiż-żewġ każijiet hemm investigazzjonijiet internazzjonali, f’dan il-każ mill-Awtoritajiet Olandiżi u l-pulizija fl-Iżveżja, dan huwa mod kif ir-reputazzjoni ta’ pajjiżna qed tiġi mtappna internazzjonalment. Dr Busuttil qal ukoll li mhux biss hemm inkonsistenza minn Simon Busuttil bejn dak li jgħidu u dak li jagħmel iżda ironija fejn fil-każ ta’ Beppe Fenech li tant tkellem fuq ir-rwol u responsabbilitajiet ta’ Diretturi f’kumpaniji fiduċjarji fl-istess żmien li l-awtoritajiet Olandiżi talbu l-għajnuna, li ma ngħtatax tal-Awtoritajiet Maltin fl-eqqel tal-kampanja elettorali fl-2013, ta’ kumpanija li huwa wieħed mid-Diretturi tagħha.
