F’intervista l-Ħadd filgħodu, il-Prim Ministru Robert Abela stqarr kif dan il-Gvern qatt ma beża’ mir-riformi, u li Gvern immexxi minnu qed jara li jimplimenta l-bidliet neċessarji sabiex jindirizza fejn fil-passat seta’ sar aħjar.
Innota kif b’riformi bħal dik li ser tkun diskussa fil-parlament tal-kirjiet ta’ qabel l-1995 u tal-użu tal-kannabis, il-Gvern qed jara li ssir bidla fil-kwalità tal-ħajja tan-nies.
Il-Prim Ministru Robert Abela stqarr: “Għamilna riformi li jiżguraw ‘framework’ għal pajjiżna robust ta’ governanza li fejn seta’ sar aħjar isir aħjar fil-futur. Imma mbagħad għamilna bidliet li tant ġabu differenza fil-kwalità ta’ ħajja tan-nies.”
Tkellem ukoll dwar it-trasport fejn spjega li pajjiżna għandu miri kbar ħafna sabiex issir qalba għal trasport iżjed sostenibbli. Hawn innota kif din il-ġimgħa tħabbru numru ta’ skemi b’għotjiet bla preċedent sabiex jinċentivaw il-qalba għal karozzi elettriċi. Qal kif din il-qalba qed issir billi n-nies ikunu inċentivati u mhux billi jkunu intaxxati modi differenti ta’ trasport li ma jaqblux mal-miri li għandu pajjiżna f’dan is-settur.
Innota kif fl-1 ta’ Ġunju ser jibda jingħata s-servizz tal-fast ferry bejn il-Belt Valletta u l-Imġarr Għawdex li ser ikun affordabbli. Stqarr kif dan il-Gvern għandu viżjoni kbira għal din il-gżira u qal kif filwaqt li dan il-Gvern ser jara li din il-Gżira ma tkunx irrovinata bi żvilupp li ma jagħmilx sens, ser jara li ssir gżira ‘carbon neutral’.
Dr Abela nnota wkoll kif fl-aħħar snin qed isir xogħol bla preċedent fuq l-infrastruttura stradali ta’ pajjiżna fejn diġà tlestew il-fuq minn 300 triq residenzjali bħala parti mill-investiment ta’ 700 miljun.
Dr Abela sostna: “Niftakru kemm konna jew forsi nifirħu li jiġi xi kap ta’ stat importanti biex jingħata saff tarmac, mbagħad kemm iservi kienet kwistjoni oħra. Illum dak iż-żmien spiċċa. U spiċċa għaliex nemmnu bis-saħħa li jekk pajjiżna jrid jattira turiżmu ta’ kwalità, jekk irid jibqa’ joffri kwalità ta’ ħajja aqwa għall-poplu tagħna u huwa doveruż fuqna bħala Gvern li noffru kwalità ta’ ħajja tajba lin-nies tagħna rridu nofru inftastruttura tajba.”
Mistoqsi dwar iż-żjara li għamel fil-Libja stqarr kif il-laqgħat kienu kordjali, u ż-żewġ naħat kienu ċari dwar x’qed jistennew minn xulxin. Qal kif fil-Libja hemm potenzjal qawwi għal investiment mill-Maltin, anke fid-dawl li issa hemm Gvern li daħħal element ta’ stabbiltà fil-Libja. Qal kif il-potenzjal f’dan il-pajjiż qed tarah l-Unjoni Ewropea wkoll, anke fid-dawl li l-President tal-Kunsill Ewropew stess Charles Michel ukoll żar il-Libja.
Dr Abela stqarr kif ma nistgħux inħarsu lejn dan il-pajjiż bħala sors ta’ immigrazzjoni, u spjega kif is-soluzzjoni hija li jitwaqqaf l-influss tal-immigranti min-Nofsinhar tal-Libja u mill-kosta fit-Trammuntana filwaqt li jkun hemm rilokazzjoni meta dawn iż-żewġ rimedji jfallu.
Il-Prim Ministru tenna: “Dik hija serjetà oħra illi hemm illi tiddistingwina bejn ta’ qabilna u aħna. Qabel l-2013 x’kienet il-politika tagħhom? Kull min jaqsam bid-dgħajsa, daħħal f’Malta. Dik kienet ir-realtà. Aħna ħdimna b’mod differenti. Qed ngħidu li trid tittratta s-sitwazzjoni minn aspett uman u umanitarju m’hemmx dubju imma mbagħad ukoll irridu nitilqu mill-pożizzjoni li pajjiżna ma jiflaħx iżjed pressjoni proporzjonati fuqu. Imma ngħidu dan u noffru s-soluzzjonijiet ukoll.”
Il-Prim Ministru Robert Abela stqarr kif dan il-Gvern irid jkompli jagħmel il-bidliet neċessarji b’saqajh mal-art, u jżomm idu fuq il-polz tan-nies.
Dr Abela saħaq: “Fl-istess waqt iżda rridu nibqgħu viċin in-nies, ma nistgħu nħallu l-ebda numri, li tikbrilna rasna, għaliex dak ikun l-ikbar żball li qatt nistgħu nagħmlu. Irridu nibqgħu viċin in-nies. Nifhem li għad hemm min huwa muġugħ u dawn huma weġgħat li rridu nindirizzawhom.”
Aqra wkoll:
https://www.one.com.mt/2021/04/11/qed-jitfassal-pjan-sabiex-jitwieznu-l-aktar-milquta-mill-pandemija-il-pm/
