Il-Partit Laburista għaddej minn diversi riformi taħt it-tmexxija tal-Prim Ministru u Mexxej Laburista Robert Abela.
Dan intqal mid-Deputat Mexxej għall-Affarijiet tal-Partit, Daniel Micallef waqt programm fuq il-midja soċjali mmexxi mill-preżentatur ta’ esperjenza, Reno Bugeja.
Il-Perit Daniel Micallef qal kif waħda mir-riformi hija maħsuba li ssaħħaħ id-dixxiplina tal-etika ta’ kull min jirrapreżenta lill-Partit Laburista.
Qal kif, “Jien qed nara li jkun hemm tisħiħ, one tal-proċeduri tas-salvagwardja tad-dixxiplina tal-etika, li jkun hemm skruntinju aktar kontinwu tar-rappreżentanti kollha tal-partit, li hemm proċeduri li naħseb jiena għandhom jissaħħu.”
Id-Deputat Mexxej tal-Partit Laburista semma wkoll riformi fl-operat politiku, kemm fl-operat tal-fergħat kif ukoll fuq livell lokali.
Il-Perit Daniel Micallef semma wkoll il-proċess ta’ Mitt Idea, fejn wara numru ta’ laqgħat dwar diversi setturi, bħalissa għaddej il-proċess intern biex jiġu evalwati l-ideat.
Dwar l-aħħar żviluppi fil-Qorti, Daniel Micallef innota r-riformi kbar li seħħew f’dan il-qasam taħt it-tmexxija ta’ Robert Abela.
Spjega, “Naħseb kull min qed isegwina jaf li l-amministrazzjoni ta’ Robert Abela, issa minn sena ilu ’l hawn għamel ħemel ta’ riformi li kienu ilhom fuq il-backburner f’dan il-pajjiż għal snin twal. Qed naraw azzjonijiet u istituzzjonijiet li qed jaħdmu, hawn min ma toġbux li ngħidu li l-istituzzjonijiet qed jaħdmu, inħalli l-ġudizzju f’idejn min qed isegwina. Għandna proċess ta’ ġustizzja li viżibilment li qed isir.”
Il-Perit Daniel Micallef qal li l-Partit Laburista għandu messaġġ wieħed u ċar.
Qal, “Il-messaġġ li qed inwassal illum hawn jiena u qed iwassal il-Prim Ministru, jekk wieħed isegwi dak li qal nhar il-Ħadd pereżempju, huwa wieħed ċar, fejn jinstab li sar ħażin, għemil ħażin, għamlu min għamlu, mhux ħa jsib l-ebda kenn la mingħandi, la m’għand Robert Abela u wisq anqas mill-Partit Laburista.”
Id-Deputat Mexxej Laburista qal ukoll kif il-Partit Laburista huwa partit sod u ħaj, hekk fil-gvern għamel diversi bidliet għall-pajjiżna.
Sostna, “Bħala Partit Laburista aħna rridu nibqgħu naħdmu b’umiltà, saqajna mal-art, il-fiduċja li radd il-poplu rridu mmorru lura quddiemu u ngħidulu isma dik il-fiduċja ssarfet f’dawn il-kisbiet għall-pajjiż u għandna viżjoni issa għas-snin li ġejjin.”
