Il-Pulizija arrestat raġel li allegatament wettaq hold-up armat f’ħanut tal-merċa fi Triq l-Oratorju f’Bormla.
Il-każ seħħ għall-ħabta tas-siegħa u kwart ta’ waranofsinhar, u l-Pulizija ssejħet fuq il-post minnufih. Jidher li r-raġel mgħammad u allegatament armat b’sikkina, daħal u talab il-flus lill-kaxxiera li kienet fil-ħanut. Huwa ħarab minn fuq il-post bil-flus kontanti.
Wara investigazzjonijiet mill-Pulizija tal-Iskwadra tar-Reati Maġġuri u mill-Pulizija tad-distrett, ir-raġel ġie arrestat f’Bormla stess u ttieħed fil-lockup tal-Pulizija fil-Furjana.
Ħadd ma weġġa’ f’dan il-każ.
