Il-Ministru għall-Affarijiet Barranin u Ewropej Evarist Bartolo kellu konverżazzjoni pożittiva mal-Prim Ministru nominat tal-Libja Abdul Hamid Dbeibah.
Fi stqarrija maħruġa għall-Affarijiet Barranin u Ewropej intqal li l-Prim Ministru nominat tal-Libja rrikonoxxa li Malta dejjem offriet ħbiberija u għajnuna lill-poplu Libjan u l-poplu Malti huwa meqjus bħala ħabib tagħna. F’dan iż-żmien kruċjali, madankollu, esprima t-tama li Malta toffri aktar appoġġ.
Min-naħa tiegħu l-Ministru Evarist Bartolo spjega li x-xogħol fuq il-ftuħ ta’ Konsulat Malti fi Tripli jinsab fi stadju avvanzat ħafna kif ukoll dak tal-ftuħ, għal darb’oħra, tal-Ambaxxata fil-Libja. Il-Ministru għall-Affarijiet Barranin u Ewropej iddikjara li l-uffiċċji rappreżentattivi Maltin għandhom ikunu qed jiffunzjonaw bis-sħiħ fil-ġimgħat li ġejjin.
Huwa tenna li Malta se tkun qed tindirizza wkoll il-problema rigward il-viżi u l-permessi tar-residenza biex tiżgura li jiġu evitati dewmien bla bżonn u tbatijiet għal-Libjani.
Il-Prim Ministru nominat tal-Libja Abdul Hamid Dbeibah semma l-ħtieġa li jerġgħu jibdew it-titjiriet bejn il-Libja u Malta. Din il-kwistjoni qed tiġi indirizzata u Malta se tkun iggwidata mill-Awtoritajiet tal-Unjoni Ewropea.
Il-Ministru Bartolo u l-Prim Ministru nominat tal-Libja Abdul Hamid Dbeibah iddiskutew il-passi li jridu jittieħdu biex jiffaċilitaw il-ftuħ ta’ kontijiet bankarji għal-Libjani f’Malta, sakemm jiġu osservati r-regolamenti finanzjarji internazzjonali kollha. Dwar id-Dinari Libjani miżmuma minn Malta, il-Ministru Bartolo spjega li Malta tkun lesta tgħaddihom ladarba n-Nazzjonijiet Uniti tagħti l-approvazzjoni tagħha u l-flus imorru għand istituzzjoni finanzjarja magħquda għall-benefiċċju tal-Libjani kollha.
Il-Ministru Bartolo tenna li Malta qed taħdem mal-Missjoni Speċjali tan-Nazzjonijiet Uniti fil-Libja (UNSMIL) u l-UE biex ikollha Libja magħquda mmexxija mil-Libjani fil-paċi u l-prosperità.
Abdul Hamid Dbeibah iddikjara li se jkun qed jistieden lill-Prim Ministru Robert Abela fil-Libja, biex jiddiskuti aktar kwistjonijiet bilaterali, hekk kif il-gvern il-ġdid jiġi kkonfermat.
