Triq Burmarrad illum tinsab aktar sigura għal dawk kollha li jiffrekwentawha.
Dan wara li tlesta l-ewwel fażi ta’ proġett minn Infrastruttura Malta b’investiment ta’ ta’ tliet miljun u nofs ewro f’din ir-rotta ewlenija bejn il-Mosta u Burmarrad.
Proġett li l-mira ewlenija tiegħu hija li jtejjeb is-sigurtà f’din it-triq.
Fil-fatt f’din it-triq twila żewġ kilometri u nofs li hija sinonima ma’ ħafna aċċident u ħabtiet serji, tpoġġew crash barriers tal-konkos li huma ddisinjati apposta biex inaqqsu r-riskji li vettura tinqaleb jew li jkollha ħabtiet frontali.
Dwar dan ONE News tkellem mal-Kap Eżekuttiv ta’ Infrastruttura Malta Fredrick Azzopardi hekk kif spjega li dawn il-crash barriers jifilħu għall-impatt ta’ xarabank li tiżen 13-il tunnellata waqt li tkun qed tinstaq b’veloċità sa 70 kilometru fis-siegħa.
Is-Sur Azzopardi spjega:“Ser ikunu qed jeliminaw dawk li huma head on collissions – karozzi li ġejjin minn direzzjoni opposti allura se jkunu qed jeliminaw dik il-problema imma aktar minn hekk anke bħala crash barriers meta tikkumparahom ma’ crash barriers li mdorrija bihom tal-ħadid, huma aktar siguri fejn innaqqsu l-fatalitajiet u anke l-inċidenti jekk ikun hemm ikunu ferm u ferm inqas.”
Dawn jikkumplimentaw ukoll il-kisi b’materjal ta’ frizzjoni għolja f’partijiet differenti ta’ din ir-rotta biex ikompli jnaqqas ir-riskji tal-iskiddjar u b’hekk it-triq tkun aktar sigura anke għal vetturi kbar.
Infrastruttura Malta għamlet ukoll testijiet flimkien mad-Dipartiment tal-Protezzjoni Ċivili u d-Dipartiment tal-Emerġenza tal-Isptar Mater Dei bl-użu ta’ vetturi għat-tifi tan-nar biex b’hekk ikkonfermaw li l-karreġġjata eżistenti hija wiesgħa biżżejjed biex takkomoda żewġ vetturi għat-tifi tan-nar ħdejn xulxin.
Fit-tieni fażi, meta jiġi konkluż il-proċess għall-ħruġ tal-permess neċċessarju mill-awtoritajiet rispettivi, l-aġenzija se tibni wkoll roundabout oħra ġdida f’salib it-toroq ma’ Triq is-Sardin. Din ir-roundabout se sservi bħala miżura oħra għat-trażżin fis-sewqan meta toqrob lejn iż-żona residenzjali ta’ Burmarrad, filwaqt li tkompli ttejjeb l-aċċess lir-residenti f’din il-parti tal-lokalità.
Dan filwaqt li l-entità governattiva ifformat ukoll roundabout ġdida għal konnessjonijiet aktar siguri ma’ Triq tal-Ħmieri u Triq Għajn Rihana biex tiffaċilita l-aċċess b’mod aktar sigur anke lejn inħawi rurali fil-viċin.
Intant Azzopardi tkellem ukoll dwar allegazzjonijiet fuq il-ġiebja maġenb it-triq u li tintuża mill-bdiewa tal-inħawi.
Spjega kif din mhux se tiġġarraf hekk kif saħansitra l-Awtorità tal-Ippjanar ippreżentat pjanti ġodda sabiex din tkun tista’ tintuża għat-tisqija tal-għelieqi.
Is-Sur Azzopardi tenna: “Filwaqt li fil-bidu konna ser inkunu qed nintervjenu u titneħħa din il-ġiebja wara li anke ddiskutejna mal-bdiewa u r-residenti tal-akkwati ġie deċiż li nbiddlu l-pjanti u għaldaqstant mhux ser tkun qed titneħħa u se tibqa’ tintuża anke wara li jitlesta l-proġett.”
